KHayal-e-pursish-e-farda se ghabrana nahin aata

ḳhayāl-e-pursish-e-fardā se ghabrānā nahīñ aatā

gunah kartā huuñ lekin mujh ko pachhtānā nahīñ aatā

yaqīn-e-da.avā-e-ulfat nahīñ maanā nahīñ aatā

magar ye bhī to hai jhūToñ ko jhuTlānā nahīñ aatā

tabī.at hai ġhayūr aisī ki tishna-kām rahtā huuñ

lagī-lipTī kisī kī sun ke pī jaanā nahīñ aatā

mirī nākāmiyāñ dil kā chaman shādāb rakhtī haiñ

ye vo kaliyāñ haiñ jin ko khil ke murjhānā nahīñ aatā

kisī ke vāda-e-bātil se taskīñ ho nahīñ saktī

khilaune de ke mujh ko dil kā bahlānā nahīñ aatā

vafā kī dāstāñ duniyā meñ 'kaifī' kab nahīñ chhiḌtī

zabān-e-ḳhalq par kab merā afsāna nahīñ aatā

KHayal-e-pursish-e-farda se ghabrana nahin aata

gunah karta hun lekin mujh ko pachhtana nahin aata

yaqin-e-dawa-e-ulfat nahin mana nahin aata

magar ye bhi to hai jhuTon ko jhuTlana nahin aata

tabiat hai ghayur aisi ki tishna-kaam rahta hun

lagi-lipTi kisi ki sun ke pi jaana nahin aata

meri nakaamiyan dil ka chaman shadab rakhti hain

ye wo kaliyan hain jin ko khil ke murjhana nahin aata

kisi ke wada-e-baatil se taskin ho nahin sakti

khilaune de ke mujh ko dil ka bahlana nahin aata

wafa ki dastan duniya mein 'kaifi' kab nahin chhiDti

zaban-e-KHalq par kab mera afsana nahin aata