KHayal-e-yar ka jalwa yahan bhi tha wahan bhi tha

ḳhayāl-e-yār kā jalva yahāñ bhī thā vahāñ bhī thā

zamīñ par paañv the mere nazar meñ āsmāñ bhī thā

diye raushan the har jānib añdherā thā magar dil meñ

bahut tanhā thā maiñ lekin sharīk-e-kārvāñ bhī thā

chune tinke bahut maiñ ne banāyā āshiyāñ apnā

azal se ik musāfir huuñ mujhe is kā gumāñ bhī thā

udhar jaanā bhī thā lāzim idhar majbūr thī sohnī

ghaḌā kachchā thā hāthoñ meñ udhar dariyā javāñ bhī thā

sabhī shāmil the yaaro yuuñ to gulshan kī tabāhī meñ

ab itnā saaf kyā kahiye ki un meñ bāġhbāñ bhī thā

mire har zaḳhm par ik dāstāñ thī us ke zulmoñ kī

mire ḳhūñ-bār dil par us ke hāthoñ kā nishāñ bhī thā

mukartā thā vo apne tiir se to ik taraf 'āzim'

udhar thāme hue ik haath meñ zālim kamāñ bhī thā

KHayal-e-yar ka jalwa yahan bhi tha wahan bhi tha

zamin par panw the mere nazar mein aasman bhi tha

diye raushan the har jaanib andhera tha magar dil mein

bahut tanha tha main lekin sharik-e-karwan bhi tha

chune tinke bahut main ne banaya aashiyan apna

azal se ek musafir hun mujhe is ka guman bhi tha

udhar jaana bhi tha lazim idhar majbur thi sohni

ghaDa kachcha tha hathon mein udhar dariya jawan bhi tha

sabhi shamil the yaro yun to gulshan ki tabahi mein

ab itna saf kya kahiye ki un mein baghban bhi tha

mere har zaKHm par ek dastan thi us ke zulmon ki

mere KHun-bar dil par us ke hathon ka nishan bhi tha

mukarta tha wo apne tir se to ek taraf 'azim'

udhar thame hue ek hath mein zalim kaman bhi tha