KHayal itna sitam-ijad rakhna

ḳhayāl itnā sitam-ījād rakhnā

vafā.eñ kuchh hamārī yaad rakhnā

nahīñ shikva jo rakkhā ham ko nāshād

qayāmat hai adū ko shaad rakhnā

batā kyā thā ki mujh ko qatl kar ke

jigar par haath o jallād rakhnā

adū ke saath karnā aish-o-ishrat

hameñ o bevafā nāshād rakhnā

jo mahfil meñ ho terī daur-e-sāġhar

zarā saaqī hameñ bhī yaad rakhnā

khiñche us shoḳh kī tasvīr dilkash

adā koī na.ī bahzād rakhnā

mujhe duniyā se jis but ne miTāyā

ḳhudāyā tū use ābād rakhnā

mirā dil nāzoñ kā paalā huā hai

liye jaate ho us ko shaad rakhnā

kahīñ mil jaa.e dil us kā na ai dil

ḳhayāl itnā dam-e-fariyād rakhnā

ġhazab hai tujh ko o qātil na aaya

gale par ḳhanjar-e-faulād rakhnā

'diler' itnā kahe dete haiñ tum se

ḳhayāl-e-ḳhātir-e-jallād rakhnā

KHayal itna sitam-ijad rakhna

wafaen kuchh hamari yaad rakhna

nahin shikwa jo rakkha hum ko nashad

qayamat hai adu ko shad rakhna

bata kya tha ki mujh ko qatl kar ke

jigar par hath o jallad rakhna

adu ke sath karna aish-o-ishrat

hamein o bewafa nashad rakhna

jo mahfil mein ho teri daur-e-saghar

zara saqi hamein bhi yaad rakhna

khinche us shoKH ki taswir dilkash

ada koi nai bahzad rakhna

mujhe duniya se jis but ne miTaya

KHudaya tu use aabaad rakhna

mera dil nazon ka pala hua hai

liye jate ho us ko shad rakhna

kahin mil jae dil us ka na ai dil

KHayal itna dam-e-fariyaad rakhna

ghazab hai tujh ko o qatil na aaya

gale par KHanjar-e-faulad rakhna

'diler' itna kahe dete hain tum se

KHayal-e-KHatir-e-jallad rakhna