KHayal jin ka hamein roz-o-shab satata hai

ḳhayāl jin kā hameñ roz-o-shab satātā hai

kabhī unheñ bhī hamārā ḳhayāl aatā hai

tumhārā ishq jise ḳhaak meñ milātā hai

isī kī ḳhaak se phir phuul bhī khilātā hai

Dhalegī raat to phailegā nuur bhī is kā

charāġh apnā sar-e-shām jhilmilātā hai

na tai huī tirī sham-e-jamāl se bhī jo raah

vahīñ pe merā junūñ rāsta dikhātā hai

na jaane shauq ko aadat hai kyuuñ bahakne kī

tirā hijāb to be-shak adab sikhātā hai

kahāñ bujhā.e se bujhte haiñ ishq ke sho.ale

charāġh yuuñ to jo jaltā hai bujh bhī jaatā hai

ye bād-e-rāh-e-guzar dar-ḳhur-e-chaman na sahī

ġhubār kā bhī Thikānā nikal hī aatā hai

junūñ kī chaal pe ThiTkī na vo nazar tanhā

yahāñ zamāna bhī qadmoñ meñ loT jaatā hai

hai tere ġham kī ġham-e-rozgār se sāzish

kahāñ kahāñ dil-e-dīvāna kaam aatā hai

'surūr' jins-e-vafā bechte nahīñ phirte

jigar ke daaġh dikhānā to sab ko aatā hai

KHayal jin ka hamein roz-o-shab satata hai

kabhi unhen bhi hamara KHayal aata hai

tumhaara ishq jise KHak mein milata hai

isi ki KHak se phir phul bhi khilata hai

Dhalegi raat to phailega nur bhi is ka

charagh apna sar-e-sham jhilmilata hai

na tai hui teri sham-e-jamal se bhi jo rah

wahin pe mera junun rasta dikhata hai

na jaane shauq ko aadat hai kyun bahakne ki

tera hijab to be-shak adab sikhata hai

kahan bujhae se bujhte hain ishq ke shoale

charagh yun to jo jalta hai bujh bhi jata hai

ye baad-e-rah-e-guzar dar-KHur-e-chaman na sahi

ghubar ka bhi Thikana nikal hi aata hai

junun ki chaal pe ThiTki na wo nazar tanha

yahan zamana bhi qadmon mein loT jata hai

hai tere gham ki gham-e-rozgar se sazish

kahan kahan dil-e-diwana kaam aata hai

'surur' jins-e-wafa bechte nahin phirte

jigar ke dagh dikhana to sab ko aata hai