KHayal ko zau nazar ko tabish nafas ko raKHshandagi milegi

ḳhayāl ko zau nazar ko tābish nafas ko raḳhshandagī milegī

bhaḌak uThā soz-e-ġham jo dil meñ to har kahīñ raushnī milegī

ḳhalish kī tah meñ sukūñ milegā alam kī tah meñ ḳhushī milegī

baġhaur dekho to maut meñ bhī tumheñ na.ī zindagī milegī

maqām-e-insāñ maqām-e-yazdāñ meñ fāsla hai bas ik qadam kā

jahāñ malegī ḳhudī kī sarhad vahīñ had-e-be-ḳhudī milegī

ye zauq-e-sajda shikast-ḳhurda tabī.atoñ kī hai ḳhud-farebī

bashar kī taslīm kī tahoñ meñ bashar kī kam-himmatī milegī

nigāh jitnī bulandī hogī ye utnī hī arjumand hogī

ba-qadr-e-qurb-e-falak kiran meñ harārat-o-raushnī milegī

hai ḳhud-shanāsī jahāñ-shanāsī jahāñ-shanāsī ḳhudā-shanāsī

milī jo tujh ko ḳhudī kī daulat to daulat-e-sarmadī milegī

agar hai terī nigāh bāliġh agar hai terā shu.ūr puḳhta

to jehl kī zulmatoñ hī se tujh ko mash.al-e-āgahī malegī

ġham-o-musarrat mileñge bāham to zindagī bhī chamak uThegī

ye rū hai manfī ye rū hai musbat milegī ye raushnī milegī

rah-e-talab ke safar meñ 'ra.anā' sukūñ hai ḳhvāb-o-ḳhayāl yaksar

qadam qadam Thokareñ lageñgī nafas nafas barhamī milegī

KHayal ko zau nazar ko tabish nafas ko raKHshandagi milegi

bhaDak uTha soz-e-gham jo dil mein to har kahin raushni milegi

KHalish ki tah mein sukun milega alam ki tah mein KHushi milegi

baghaur dekho to maut mein bhi tumhein nai zindagi milegi

maqam-e-insan maqam-e-yazdan mein fasla hai bas ek qadam ka

jahan malegi KHudi ki sarhad wahin had-e-be-KHudi milegi

ye zauq-e-sajda shikast-KHurda tabiaton ki hai KHud-farebi

bashar ki taslim ki tahon mein bashar ki kam-himmati milegi

nigah jitni bulandi hogi ye utni hi arjumand hogi

ba-qadr-e-qurb-e-falak kiran mein hararat-o-raushni milegi

hai KHud-shanasi jahan-shanasi jahan-shanasi KHuda-shanasi

mili jo tujh ko KHudi ki daulat to daulat-e-sarmadi milegi

agar hai teri nigah baaligh agar hai tera shuur puKHta

to jehl ki zulmaton hi se tujh ko mashal-e-agahi malegi

gham-o-musarrat milenge baham to zindagi bhi chamak uThegi

ye ru hai manfi ye ru hai musbat milegi ye raushni milegi

rah-e-talab ke safar mein 'rana' sukun hai KHwab-o-KHayal yaksar

qadam qadam Thokaren lagengi nafas nafas barhami milegi