KHayal ko zau nazar ko tabish nafas ko raKHshandagi milegi

ḳhayāl ko zau nazar ko tābish nafas ko raḳhshandagī milegī

bhaḌak uThā soz-e-ġham jo dil meñ to har kahīñ raushnī milegī

maqām-e-insāñ maqām-e-yazdāñ jo fāsla hai to ik qadam kā

jahāñ milegī ḳhudī kī sarhad vahīñ had-e-be-ḳhudī milegī

na ziist ko hai davām hāsil na maut ko hai sabāt hāsil

ḳhizāñ meñ murjhā.egī jo Tahnī bahār meñ phir harī milegī

nigāh jitnī buland hogī usī qadar arjumand hogī

ba-qadr-e-qurb-e-falak kiran meñ harārat-o-raushnī milegī

rah-e-talab ke safar meñ 'rā'nā' sukūñ hai ḳhvāb-o-ḳhayāl yaksar

qadam-qadam Thokareñ lageñgī nafas-nafas barhamī milegī

KHayal ko zau nazar ko tabish nafas ko raKHshandagi milegi

bhaDak uTha soz-e-gham jo dil mein to har kahin raushni milegi

maqam-e-insan maqam-e-yazdan jo fasla hai to ek qadam ka

jahan milegi KHudi ki sarhad wahin had-e-be-KHudi milegi

na zist ko hai dawam hasil na maut ko hai sabaat hasil

KHizan mein murjhaegi jo Tahni bahaar mein phir hari milegi

nigah jitni buland hogi usi qadar arjumand hogi

ba-qadr-e-qurb-e-falak kiran mein hararat-o-raushni milegi

rah-e-talab ke safar mein 'ra'na' sukun hai KHwab-o-KHayal yaksar

qadam-qadam Thokaren lagengi nafas-nafas barhami milegi