KHayal-o-KHwab hua barg-o-bar ka mausam

ḳhayāl-o-ḳhvāb huā barg-o-bār kā mausam

bichhaḌ gayā tirī sūrat bahār kā mausam

ka.ī rutoñ se mire nīm-vā darīchoñ meñ

Thahar gayā hai tire intizār kā mausam

vo narm lahje meñ kuchh to kahe ki lauT aa.e

samā'atoñ kī zamīñ par phuvār kā mausam

payām aayā hai phir ek sarv-qāmat kā

mire vujūd ko khīñche hai daar kā mausam

vo aag hai ki mirī por por jaltī hai

mire badan ko milā hai chinār kā mausam

rafāqatoñ ke na.e ḳhvāb ḳhushnumā haiñ magar

guzar chukā hai tire e’tibār kā mausam

havā chalī to na.ī bārisheñ bhī saath aa.iiñ

zamīñ ke chehre pe aayā nikhār kā mausam

vo merā naam liye jaa.e aur maiñ us kā naam

lahū meñ guuñj rahā hai pukār kā mausam

qadam rakhe mirī ḳhushbū ki ghar ko lauT aa.e

koī batā.e mujhe kū-e-yār kā mausam

vo roz aa ke mujhe apnā pyaar pahnā.e

mirā ġhurūr hai bele ke haar kā mausam

tire tarīq-e-mohabbat pe bārhā sochā

ye jabr thā ki tire iḳhtiyār kā mausam

KHayal-o-KHwab hua barg-o-bar ka mausam

bichhaD gaya teri surat bahaar ka mausam

kai ruton se mere nim-wa darichon mein

Thahar gaya hai tere intizar ka mausam

wo narm lahje mein kuchh to kahe ki lauT aae

sama'aton ki zamin par phuwar ka mausam

payam aaya hai phir ek sarw-qamat ka

mere wujud ko khinche hai dar ka mausam

wo aag hai ki meri por por jalti hai

mere badan ko mila hai chinar ka mausam

rafaqaton ke nae KHwab KHushnuma hain magar

guzar chuka hai tere e’tibar ka mausam

hawa chali to nai barishen bhi sath aain

zamin ke chehre pe aaya nikhaar ka mausam

wo mera nam liye jae aur main us ka nam

lahu mein gunj raha hai pukar ka mausam

qadam rakhe meri KHushbu ki ghar ko lauT aae

koi batae mujhe ku-e-yar ka mausam

wo roz aa ke mujhe apna pyar pahnae

mera ghurur hai bele ke haar ka mausam

tere tariq-e-mohabbat pe barha socha

ye jabr tha ki tere iKHtiyar ka mausam