KHayal-o-KHwab ko paband-e-KHu-e-yar rakha

ḳhayāl-o-ḳhvāb ko pāband-e-ḳhū-e-yār rakhā

so dil ko dil kī jagah ham ne baar baar rakkhā

use bhī maiñ ne bahut ḳhud pe iḳhtiyār diye

aur is tarah ki bahut ḳhud pe iḳhtiyār rakhā

dukhoñ kā kyā hai mujhe fikr hai ki us ne kyuuñ

bichhaḌte vaqt bhī lahje ko ḳhush-gavār rakhā

havā charāġh bujhāne lagī to ham ne bhī

diye kī lau kī jagah terā intizār rakhā

chhupā ke rakh liye andar ke apne dukh 'mohsin'

aur apnī zāhirī hālat ko bhī sañvār rakhā

KHayal-o-KHwab ko paband-e-KHu-e-yar rakha

so dil ko dil ki jagah hum ne bar bar rakkha

use bhi main ne bahut KHud pe iKHtiyar diye

aur is tarah ki bahut KHud pe iKHtiyar rakha

dukhon ka kya hai mujhe fikr hai ki us ne kyun

bichhaDte waqt bhi lahje ko KHush-gawar rakha

hawa charagh bujhane lagi to hum ne bhi

diye ki lau ki jagah tera intizar rakha

chhupa ke rakh liye andar ke apne dukh 'mohsin'

aur apni zahiri haalat ko bhi sanwar rakha