KHayal-o-KHwab mein hona sada-e-baad mein rahna

ḳhayāl-o-ḳhvāb meñ honā sadā-e-bād meñ rahnā

kisī kī aas meñ jiinā kisī kī yaad meñ rahnā

pur-asrārī ajab sī hai tirī vīrān āñkhoñ meñ

tujhe bhī raas aayā ḳhāna-e-barbād meñ rahnā

mohabbat ek bahr-e-be-karāñ hai aur mohabbat meñ

kahīñ par qaid honā hai dil-e-āzād meñ rahnā

kisī kī yaad hai uljhī huī sāñsoñ kī Dorī se

kisī ke hijr meñ hai arsa-e-fariyād meñ rahnā

to phir hijr-o-visāl-o-ranj-o-ġham saare izāfī haiñ

jo hāsil hai vafā ko ishq kī buniyād meñ rahnā

jafā kī ek sī rasmeñ hī insāñ kā muqaddar haiñ

kisī kuufa meñ jiinā ho yā ki baġhdād meñ rahnā

kisī se kyā shikāyat zindagī ko raas aayā hai

jafā ke shahr meñ dasht-e-sitam-ījād meñ rahnā

KHayal-o-KHwab mein hona sada-e-baad mein rahna

kisi ki aas mein jina kisi ki yaad mein rahna

pur-asrari ajab si hai teri viran aankhon mein

tujhe bhi ras aaya KHana-e-barbaad mein rahna

mohabbat ek bahr-e-be-karan hai aur mohabbat mein

kahin par qaid hona hai dil-e-azad mein rahna

kisi ki yaad hai uljhi hui sanson ki Dori se

kisi ke hijr mein hai arsa-e-fariyaad mein rahna

to phir hijr-o-visal-o-ranj-o-gham sare izafi hain

jo hasil hai wafa ko ishq ki buniyaad mein rahna

jafa ki ek si rasmen hi insan ka muqaddar hain

kisi kufa mein jina ho ya ki baghdad mein rahna

kisi se kya shikayat zindagi ko ras aaya hai

jafa ke shahr mein dasht-e-sitam-ijad mein rahna