KHazana-e-zar-o-gauhar pe KHak Dal ke rakh

ḳhazāna-e-zar-o-gauhar pe ḳhaak Daal ke rakh

ham ahl-e-mehr-o-mohabbat haiñ dil nikāl ke rakh

hameñ to apne samundar kī ret kaafī hai

tū apne chashma-e-be-faiz ko sambhāl ke rakh

zarā sī der kā hai ye urūj-e-māl-o-manāl

abhī se zehn meñ sab zāviye zavāl ke rakh

ye baar baar kināre pe kis ko dekhtā hai

bhañvar ke biich koī hausla uchhāl ke rakh

na jaane kab tujhe jañgal meñ raat paḌ jaa.e

ḳhud apnī aag se sho.ala koī ujaal ke rakh

javāb aa.e na aa.e savāl uThā to sahī

phir is savāl meñ pahlū na.e savāl ke rakh

tirī balā se giroh-e-junūñ pe kyā guzrī

tū apnā daftar-e-sūd-o-ziyāñ sambhāl ke rakh

chhalak rahā hai jo kashkol-e-ārzū us meñ

kisī faqīr ke qadmoñ kī ḳhaak Daal ke rakh

KHazana-e-zar-o-gauhar pe KHak Dal ke rakh

hum ahl-e-mehr-o-mohabbat hain dil nikal ke rakh

hamein to apne samundar ki ret kafi hai

tu apne chashma-e-be-faiz ko sambhaal ke rakh

zara si der ka hai ye uruj-e-mal-o-manal

abhi se zehn mein sab zawiye zawal ke rakh

ye bar bar kinare pe kis ko dekhta hai

bhanwar ke bich koi hausla uchhaal ke rakh

na jaane kab tujhe jangal mein raat paD jae

KHud apni aag se shoala koi ujal ke rakh

jawab aae na aae sawal uTha to sahi

phir is sawal mein pahlu nae sawal ke rakh

teri bala se giroh-e-junun pe kya guzri

tu apna daftar-e-sud-o-ziyan sambhaal ke rakh

chhalak raha hai jo kashkol-e-arzu us mein

kisi faqir ke qadmon ki KHak Dal ke rakh