khiDkiyan kholin to mujhko aaj andaza hua

khiḌkiyāñ kholīñ to mujh ko aaj andāza huā

merā hī saaya thā vo dīvār se lipTā huā

aaj kī shab bhī palaT aa.e binā dastak diye

so rahā thā ghar meñ koī raat kā jaagā huā

is galī ke moḌ pe baiThā huuñ kitnī der se

jis tarah koī musāfir huuñ thakā-hārā huā

jis taraf bhī ab uḌā le jaa.eñ mujh ko āñdhiyāñ

ek patta huuñ havā ke dosh pe rakkhā huā

aur bhī kuchh duur aa pahuñche ham apne shahr se

lag rahā thā rāsta jaanā huā būjhā huā

so gayā hai mere siine se lagā kar apnā sar

ik khilaune ke liye bachcha koī rotā huā

be-ta.alluq sā paḌā thā mausamoñ ke sāmne

sabz patta koī apnī shāḳh se TuuTā huā

dhuñd meñ lipTī huī thiiñ apnī tahrīreñ sabhī

paḌh nahīñ paa.e 'zafar' ham haath kā likkhā huā

khiDkiyan kholin to mujh ko aaj andaza hua

mera hi saya tha wo diwar se lipTa hua

aaj ki shab bhi palaT aae bina dastak diye

so raha tha ghar mein koi raat ka jaga hua

is gali ke moD pe baiTha hun kitni der se

jis tarah koi musafir hun thaka-haara hua

jis taraf bhi ab uDa le jaen mujh ko aandhiyan

ek patta hun hawa ke dosh pe rakkha hua

aur bhi kuchh dur aa pahunche hum apne shahr se

lag raha tha rasta jaana hua bujha hua

so gaya hai mere sine se laga kar apna sar

ek khilaune ke liye bachcha koi rota hua

be-talluq sa paDa tha mausamon ke samne

sabz patta koi apni shaKH se TuTa hua

dhund mein lipTi hui thin apni tahriren sabhi

paDh nahin pae 'zafar' hum hath ka likkha hua