khilaya partaw-e-ruKHsar ne kya gul samundar mein

khilāyā partav-e-ruḳhsār ne kyā gul samundar meñ

hubāb aa kar bane har samt se bulbul samundar meñ

hamāre āh-o-nāla se zamāna hai tah-o-bālā

kabhī hai shor sahrā meñ kabhī hai ġhul samundar meñ

kisī din mujh ko le Dūbegā hijr-e-yār kā sadma

charāġh-e-hastī-e-mauhūm hogā gul samundar meñ

na chheḌo mujh ko maiñ ġhavvās huuñ dariyā-e-ma.anī kā

na DhūñDo mujh ko mustaġhraq huuñ maiñ bilkul samundar meñ

tumheñ dariyā-e-ḳhūbī kah diyā ġharq-e-nadāmat huuñ

kahāñ ye nāz-o-ġhamza āriz-o-kākul samundar meñ

paḌā thā aks-e-rū-e-nāznīñ arsa huā us ko

par ab tak tairtā phirtā hai shakl-e-gul samundar meñ

uThī mauj-e-sabā jumbāñ se shāḳh-e-āshiyāñ paiham

chalī jaatī hai goyā kashtī-e-bulbul samundar meñ

vo pā.īñ baaġh meñ phirte haiñ maiñ fikroñ meñ Duubā huuñ

tamāshā hai ki gul gulshan meñ hai bulbul samundar meñ

abhī to sair ko jaanā lab-e-dariyā vo sīkhe haiñ

abhī to dekhiye khilte haiñ kyā kyā gul samundar meñ

ḳhayāl-e-yār kyūñ-kar aa gayā tūfān-e-girya meñ

ḳhudā ma.alūm kis shai kā banāyā pul samundar meñ

kabhī girya kā tūfāñ hai kabhī hairat kā sannāTā

kabhī bilkul huuñ sahrā meñ kabhī bilkul samundar meñ

vo zālim āshiq-āzārī kī 'parvīñ' mashq kartā hai

dikhā kar bulbuloñ ko Dāltā hai gul samundar meñ

khilaya partaw-e-ruKHsar ne kya gul samundar mein

hubab aa kar bane har samt se bulbul samundar mein

hamare aah-o-nala se zamana hai tah-o-baala

kabhi hai shor sahra mein kabhi hai ghul samundar mein

kisi din mujh ko le Dubega hijr-e-yar ka sadma

charagh-e-hasti-e-mauhum hoga gul samundar mein

na chheDo mujh ko main ghawwas hun dariya-e-mani ka

na DhunDo mujh ko mustaghraq hun main bilkul samundar mein

tumhein dariya-e-KHubi kah diya gharq-e-nadamat hun

kahan ye naz-o-ghamza aariz-o-kakul samundar mein

paDa tha aks-e-ru-e-naznin arsa hua us ko

par ab tak tairta phirta hai shakl-e-gul samundar mein

uThi mauj-e-saba jumban se shaKH-e-ashiyan paiham

chali jati hai goya kashti-e-bulbul samundar mein

wo pain bagh mein phirte hain main fikron mein Duba hun

tamasha hai ki gul gulshan mein hai bulbul samundar mein

abhi to sair ko jaana lab-e-dariya wo sikhe hain

abhi to dekhiye khilte hain kya kya gul samundar mein

KHayal-e-yar kyun-kar aa gaya tufan-e-girya mein

KHuda malum kis shai ka banaya pul samundar mein

kabhi girya ka tufan hai kabhi hairat ka sannaTa

kabhi bilkul hun sahra mein kabhi bilkul samundar mein

wo zalim aashiq-azari ki 'parwin' mashq karta hai

dikha kar bulbulon ko Dalta hai gul samundar mein