KHirad-amoz hasti hai magar ab kya kahun wo bhi

ḳhirad-āmoz hastī hai magar ab kyā kahūñ vo bhī

ki ban jaatī hai dīvānoñ kī duniyā meñ junūñ vo bhī

savāl ik be-muravvat se talab aisī ki kyā kahiye

ham apnī zindagī se māñgte haiñ aur sukūñ vo bhī

butoñ ke saath lī dī sī jo yād-allāh baaqī hai

to kyā shaiḳh-e-haram tere liye maiñ chhoḌ duuñ vo bhī

riyā-kārī ke sajde shaiḳh le baiTheñge masjid ko

kisī din dekhnā ho kar rahegī sar-nigūñ vo bhī

dharā kyā hai jo ham se yād-e-māzī le ke jā.egī

jab aa jaatī hai to do ghūñT pī letī hai ḳhuuñ vo bhī

ga.e sab valvale saarī umīdeñ ho ga.iiñ ruḳhsat

bachī hai zindagī baaqī to ab maiñ kyā karūñ vo bhī

nirālī baat duniyā-e-danī meñ kaun sī hotī

yahāñ to dīdanī hai aur mirā hāl-e-zabūñ vo bhī

musībat zindagī kī kis ke ghar ab sar chhupā.egī

ajal itnī ijāzat de ki maiñ letā chalūñ vo bhī

mohabbat ho to ho bhī jaa.e sar-bar chashm-e-pur-fan se

abhī se kyā kahūñ 'nātiq' fusūñ ye bhī fusūñ vo bhī

KHirad-amoz hasti hai magar ab kya kahun wo bhi

ki ban jati hai diwanon ki duniya mein junun wo bhi

sawal ek be-murawwat se talab aisi ki kya kahiye

hum apni zindagi se mangte hain aur sukun wo bhi

buton ke sath li di si jo yaad-allah baqi hai

to kya shaiKH-e-haram tere liye main chhoD dun wo bhi

riya-kari ke sajde shaiKH le baiThenge masjid ko

kisi din dekhna ho kar rahegi sar-nigun wo bhi

dhara kya hai jo hum se yaad-e-mazi le ke jaegi

jab aa jati hai to do ghunT pi leti hai KHun wo bhi

gae sab walwale sari umiden ho gain ruKHsat

bachi hai zindagi baqi to ab main kya karun wo bhi

nirali baat duniya-e-dani mein kaun si hoti

yahan to didani hai aur mera haal-e-zabun wo bhi

musibat zindagi ki kis ke ghar ab sar chhupaegi

ajal itni ijazat de ki main leta chalun wo bhi

mohabbat ho to ho bhi jae sar-bar chashm-e-pur-fan se

abhi se kya kahun 'natiq' fusun ye bhi fusun wo bhi