KHirad ke jumla dasatir se mukarte hue

ḳhirad ke jumla dasātīr se mukarte hue

phir aaj dil se lagā baiThe naam barte hue

sadā.eñ do ki koī kārvān-e-ġham Thahre

hameñ to raas na ā.eñge din sañvarte hue

jo mahv-e-raqs rahe rañg-o-nūr ke chau gird

bikhar ga.e haiñ tirī lau kā tauf karte hue

vo taḳht-e-jāñ thā jahāñ terī tāj-poshī kī

so kis jigar se tujhe dekh luuñ utarte hue

huā thā hukm-e-safar dil magar thā rū-gardāñ

so rah meñ baiTh rahe dil pe dosh dharte hue

tumhāre naam ke hijje sañvār kar us meñ

ab apnā naam milā.eñge rañg bharte hue

junūñ pe ta.an kareñ pārsā.ī ke vaa.iz

havas ke kūcha-e-rañgīn se guzarte hue

sahar qarīb huī aao aañkh meñ bhar leñ

ye paara paara tamannā.eñ ḳhvāb marte hue

KHirad ke jumla dasatir se mukarte hue

phir aaj dil se laga baiThe nam barte hue

sadaen do ki koi karwan-e-gham Thahre

hamein to ras na aaenge din sanwarte hue

jo mahw-e-raqs rahe rang-o-nur ke chau gird

bikhar gae hain teri lau ka tauf karte hue

wo taKHt-e-jaan tha jahan teri taj-poshi ki

so kis jigar se tujhe dekh lun utarte hue

hua tha hukm-e-safar dil magar tha ru-gardan

so rah mein baiTh rahe dil pe dosh dharte hue

tumhaare nam ke hijje sanwar kar us mein

ab apna nam milaenge rang bharte hue

junun pe tan karen parsai ke waiz

hawas ke kucha-e-rangin se guzarte hue

sahar qarib hui aao aankh mein bhar len

ye para para tamannaen KHwab marte hue