KHizan jab aae to aankhon mein KHak Dalta hun

ḳhizāñ jab aa.e to āñkhoñ meñ ḳhaak Dāltā huuñ

hare daraḳhtoñ ko be-barg kis tarah dekhūñ

chaman kī aañkh se mausam ke husn ko dekhūñ

bahār aa.e to pattoñ ke pairahan pahnūñ

dil o nigāh kā ye fāsla bhī kyuuñ rah jaa.e

agar tū aa.e to maiñ dil ko aañkh meñ rakh luuñ

na pūchh haal mirā huuñ vo ātish-e-ḳhāmosh

zarā havā to chale aur maiñ bhaḌak uTThūñ

inhī ke zahr se hai raushnī bhī āñkhoñ meñ

ye phuul saañp haiñ chūmūñ ki ehtiyāt karūñ

kabhī samajh meñ na aayā vo kaun hai kyā hai

yahī bahut hai ki maiñ apne dil ko samjhā luuñ

utaar pheñk kabhī to ġhubār sā malbūs

ye terā jism hai pyāre ki raushnī kā sutūñ

KHizan jab aae to aankhon mein KHak Dalta hun

hare daraKHton ko be-barg kis tarah dekhun

chaman ki aankh se mausam ke husn ko dekhun

bahaar aae to patton ke pairahan pahnun

dil o nigah ka ye fasla bhi kyun rah jae

agar tu aae to main dil ko aankh mein rakh lun

na puchh haal mera hun wo aatish-e-KHamosh

zara hawa to chale aur main bhaDak uTThun

inhi ke zahr se hai raushni bhi aankhon mein

ye phul sanp hain chumun ki ehtiyat karun

kabhi samajh mein na aaya wo kaun hai kya hai

yahi bahut hai ki main apne dil ko samjha lun

utar phenk kabhi to ghubar sa malbus

ye tera jism hai pyare ki raushni ka sutun