KHizan ka jo gulshan se paD jae pala

ḳhizāñ kā jo gulshan se paḌ jaa.e paalā

to sehn-e-chaman meñ na gul ho na laala

liyā tere āshiq ne barsoñ sambhālā

bahut kar gayā marne vaalā kasālā

pa.e-fāteha haath uThāvegā koī

sar-e-turbat-e-bekasāñ aane vaalā

isī girya ke taar se merī āñkheñ

banā deñgī naddī bahā deñgī naalā

biThā kar tumheñ sham.a ke paas dekhā

tum āñkhoñ kī putlī vo ghar kā ujālā

ḳhat-e-shauq ko paḌh ke qāsid se bole

ye hai kaun dīvāna ḳhat likhne vaalā

diyā hukm saaqī ko pīr-e-muġhāñ ne

pai-e-muhtasib jām-o-mīnā uThā lā

ye sunte hī mai-ḳhvār bole ḳhushī se

hamīñ sā hai ye nek allāh vaalā

haqīqat meñ 'sā.il' ne zauq-e-adab se

jahāñ tak uchhālā gayā naam uchhālā

KHizan ka jo gulshan se paD jae pala

to sehn-e-chaman mein na gul ho na lala

liya tere aashiq ne barson sambhaala

bahut kar gaya marne wala kasala

pae-fateha hath uThawega koi

sar-e-turbat-e-bekasan aane wala

isi girya ke tar se meri aankhen

bana dengi naddi baha dengi nala

biTha kar tumhein shama ke pas dekha

tum aankhon ki putli wo ghar ka ujala

KHat-e-shauq ko paDh ke qasid se bole

ye hai kaun diwana KHat likhne wala

diya hukm saqi ko pir-e-mughan ne

pai-e-muhtasib jam-o-mina uTha la

ye sunte hi mai-KHwar bole KHushi se

hamin sa hai ye nek allah wala

haqiqat mein 'sail' ne zauq-e-adab se

jahan tak uchhaala gaya nam uchhaala