خزاں کے دور میں بھی ہم بہار بن کے چھائے ہیں

خزاں کے دور میں بھی ہم بہار بن کے چھائے ہیں

غموں کے سائے میں بھی رہ کے ہم تو مسکرائے ہیں

چراغ امن کے بجھے بجھے ہوئے تھے ہر طرف

ڈرے ہوئے دلوں کو ہم نے حوصلے دلائے ہیں

ہمارا کیا بگاڑیں گی یہ نفرتوں کی آندھیاں

قدم رہ حیات میں کچھ اس طرح بڑھائے ہیں

غموں سے کھیلتے ہوئے یہ یاد رکھنا چاہئے

جہاں میں کھو کے کچھ نہ کچھ بڑے مقام پائے ہیں

ہوئی ہے ہم میں تم میں جب سے دوریاں اے جان من

نہ تم ہی مسکرائے ہو نہ ہم ہی مسکرائے ہیں

تری ہی بزم میں نہیں ترے لیے تری قسم

جہاں بھی ہم گئے سلامتی کے جام اٹھائے ہیں

بلندیوں کو چھونے ہی کے واسطے جہان میں

نئے نئے ترقیوں کے راستے بنائے ہیں