KHizan ke jaane se ho ya bahaar aane se

ḳhizāñ ke jaane se ho yā bahār aane se

chaman meñ phuul khileñge kisī bahāne se

vo dekhtā rahe muḌ muḌ ke sū-e-dar kab tak

jo karvaTeñ bhī badaltā nahīñ Thikāne se

ugal na sañg-e-malāmat ḳhudā se Dar nāseh

milegā kyā tujhe shīshoñ ke TuuT jaane se

zamāna aap kā hai aur aap us ke haiñ

laḌā.ī mol leñ ham muft kyuuñ zamāne se

ḳhudā kā shukr savere hī aa gayā qāsid

maiñ bach gayā shab-e-furqat ke naaz uThāne se

maiñ kuchh kahūñ na kahūñ kah rahī hai ḳhāk-e-jabīñ

ki is jabīñ ko hai nisbat ik āstāne se

qayāmat aa.e qayāmat se maiñ nahīñ Dartā

uThā to de koī parda kisī bahāne se

ḳhabar bhī hai tujhe ā.īna dekhne vaale

kahāñ gayā hai dupaTTa sarak ke shāne se

ye zindagī bhī koī zindagī huī 'bismil'

na ro sake na kabhī hañs sake Thikāne se

KHizan ke jaane se ho ya bahaar aane se

chaman mein phul khilenge kisi bahane se

wo dekhta rahe muD muD ke su-e-dar kab tak

jo karwaTen bhi badalta nahin Thikane se

ugal na sang-e-malamat KHuda se Dar naseh

milega kya tujhe shishon ke TuT jaane se

zamana aap ka hai aur aap us ke hain

laDai mol len hum muft kyun zamane se

KHuda ka shukr sawere hi aa gaya qasid

main bach gaya shab-e-furqat ke naz uThane se

main kuchh kahun na kahun kah rahi hai KHak-e-jabin

ki is jabin ko hai nisbat ek aastane se

qayamat aae qayamat se main nahin Darta

uTha to de koi parda kisi bahane se

KHabar bhi hai tujhe aaina dekhne wale

kahan gaya hai dupaTTa sarak ke shane se

ye zindagi bhi koi zindagi hui 'bismil'

na ro sake na kabhi hans sake Thikane se