KHizan se peshtar sara chaman barbaad hota hai

ḳhizāñ se peshtar saarā chaman barbād hotā hai

ġhazab hotā hai jab ḳhud bāġhbāñ sayyād hotā hai

tujhe is par gumān-e-naġhma-e-sayyād hotā hai

qafas meñ nāla-kash murġh-e-gulistāñ-zād hotā hai

ḳhushī ke baa'd ik tū hī nahīñ hai mubtalā-e-ġham

yūñhī aksar jahāñ meñ ai dil-e-nāshād, hotā hai

ravā rakhtā hai vo bedād pahle apnī fitrat par

jo insāñ dūsre par mā.il-e-bedād hotā hai

jo kartā hai nisār-e-nau-e-insāñ apnī hastī ko

vo insāñ iftiḳhār-e-ālam-e-ījād hotā hai

mire ash'ār kī tausīf hotī hai mire hote

nahīñ mā'lūm mere baa'd kyā irshād hotā hai

na kar 'mahrūm' tū fikr-e-suḳhan ab fikr-e-uqbā kar

navā-parvāz bazm-e-sher meñ āzād hotā hai

KHizan se peshtar sara chaman barbaad hota hai

ghazab hota hai jab KHud baghban sayyaad hota hai

tujhe is par guman-e-naghma-e-sayyaad hota hai

qafas mein nala-kash murgh-e-gulistan-zad hota hai

KHushi ke ba'd ek tu hi nahin hai mubtala-e-gham

yunhi aksar jahan mein ai dil-e-nashad, hota hai

rawa rakhta hai wo bedad pahle apni fitrat par

jo insan dusre par mail-e-bedad hota hai

jo karta hai nisar-e-nau-e-insan apni hasti ko

wo insan iftiKHar-e-alam-e-ijad hota hai

mere ash'ar ki tausif hoti hai mere hote

nahin ma'lum mere ba'd kya irshad hota hai

na kar 'mahrum' tu fikr-e-suKHan ab fikr-e-uqba kar

nawa-parwaz bazm-e-sher mein aazad hota hai