kho diya nur-e-basirat tu ne ma-o-man ke bich

kho diyā nūr-e-basīrat tū ne mā-o-man ke biich

jalva-gar thā varna vo ḳhurshīd tere man ke biich

pāra-e-bekār haiñ vahdat meñ jab tak hai duī

rāh-e-yaktā.ī hai rishta ke ta.iiñ sozan ke biich

saaf kar dil taaki ho ā.īna-e-ruḳhsār-e-yār

māna-e-raushan-dilī hai zañg is aahan ke biich

zāhir o pinhāñ hai har zarra meñ vo ḳhurshīd-rū

āshkār o muḳhtafī hai jaan jaise tan ke biich

duur ho gar shāmma se tere ġhaflat kā zukām

tū usī kī bū ko paave har gul-o-sausan ke biich

kūcha-gardī tā-kujā juuñ kāh-e-bād-e-hirs se

gaaḌ kar pā baiTh misl-e-koh tū maskan ke biich

kyuuñ abas bhaTkā phire hai juuñ zuleḳhā shahr shahr

jalva-e-yūsuf hai ġhāfil tere pairāhan ke biich

kab dimāġh apnā ki kiije jā ke gul-gasht-e-chaman

aur hī gulzār apne dil ke hai gulshan ke biich

mat mujhe taklīf-e-sair-e-bāġh de 'bedār' tū

gul se rañgīñ-tar hai yaañ laḳht-e-jigar dāman ke biich

kho diya nur-e-basirat tu ne ma-o-man ke bich

jalwa-gar tha warna wo KHurshid tere man ke bich

para-e-bekar hain wahdat mein jab tak hai dui

rah-e-yaktai hai rishta ke tain sozan ke bich

saf kar dil taki ho aaina-e-ruKHsar-e-yar

mana-e-raushan-dili hai zang is aahan ke bich

zahir o pinhan hai har zarra mein wo KHurshid-ru

aashkar o muKHtafi hai jaan jaise tan ke bich

dur ho gar shamma se tere ghaflat ka zukaam

tu usi ki bu ko pawe har gul-o-sausan ke bich

kucha-gardi ta-kuja jun kah-e-baad-e-hirs se

gaD kar pa baiTh misl-e-koh tu maskan ke bich

kyun abas bhaTka phire hai jun zuleKHa shahr shahr

jalwa-e-yusuf hai ghafil tere pairahan ke bich

kab dimagh apna ki kije ja ke gul-gasht-e-chaman

aur hi gulzar apne dil ke hai gulshan ke bich

mat mujhe taklif-e-sair-e-bagh de 'bedar' tu

gul se rangin-tar hai yan laKHt-e-jigar daman ke bich