khoe gae to aaine ko moatabar kiya

kho.e ga.e to aa.ine ko mo'atabar kiyā

ham ne tirī talāsh meñ apnā safar kiyā

be-ghar musāfiroñ ke muqaddar meñ ḳhaak hai

so ham ne gard-e-rāh ko dīvār-o-dar kiyā

us markaz-e-jamāl ke ham bhī asiir haiñ

jis markaz-e-jamāl ne har dil meñ ghar kiyā

shahr-e-vafā ḳhamosh hai patthar bane baġhair

kaisā fareb-e-koh-e-nidā ne asar kiyā

baazū sameTte haiñ daraḳhtoñ pe kuchh tuyūr

shāyad kisī ne tazkira-e-bāl-o-par kiyā

yādoñ kī bhiiḌ meñ bhī hai tanhā.ī ham-safar

us kī ho ḳhair jis ne hameñ dar-ba-dar kiyā

khoe gae to aaine ko mo'atabar kiya

hum ne teri talash mein apna safar kiya

be-ghar musafiron ke muqaddar mein KHak hai

so hum ne gard-e-rah ko diwar-o-dar kiya

us markaz-e-jamal ke hum bhi asir hain

jis markaz-e-jamal ne har dil mein ghar kiya

shahr-e-wafa KHamosh hai patthar bane baghair

kaisa fareb-e-koh-e-nida ne asar kiya

bazu sameTte hain daraKHton pe kuchh tuyur

shayad kisi ne tazkira-e-baal-o-par kiya

yaadon ki bhiD mein bhi hai tanhai ham-safar

us ki ho KHair jis ne hamein dar-ba-dar kiya