KHud aazma ke bhi dawe ajal ke dekhte hain

ḳhud aazmā ke bhī dā've ajal ke dekhte haiñ

dayār-e-shauq meñ ik baar chal ke dekhte haiñ

pighaltī hai ki nahīñ barf-e-nā-shanāsā.ī

kisī kī garm-nigāhī se jal ke dekhte haiñ

ye dasht-e-hū sar-e-gulshan kahāñ se aa niklā

ye mo'jiza hai to ghar se nikal ke dekhte haiñ

jinheñ milī hī nahīñ chashm-o-dil kī bīnā.ī

tamāshe vo bhī ḳhumār-e-azal ke dekhte haiñ

usī ke zikr se mahfil meñ phuul khilte the

vo aa gayā hai to sab aañkh mal ke dekhte haiñ

kisī ko aaj ke hālāt par qarār nahīñ

hamāre shahr meñ sab ḳhvāb kal ke dekhte haiñ

abhī to lams-e-badan kā hisāb baaqī hai

ta'alluqāt ke pahlū badal ke dekhte haiñ

na koī nāra-e-tahsīñ-numā na dād-e-suḳhan

ki sunñe vaale bhī tevar ġhazal ke dekhte haiñ

na jaane kab sar-e-ā.īna ḳhauf likh jaa.e

ham apnā chehra bhī 'nāmī' sañbhal ke dekhte haiñ

KHud aazma ke bhi da'we ajal ke dekhte hain

dayar-e-shauq mein ek bar chal ke dekhte hain

pighalti hai ki nahin barf-e-na-shanasai

kisi ki garm-nigahi se jal ke dekhte hain

ye dasht-e-hu sar-e-gulshan kahan se aa nikla

ye mo'jiza hai to ghar se nikal ke dekhte hain

jinhen mili hi nahin chashm-o-dil ki binai

tamashe wo bhi KHumar-e-azal ke dekhte hain

usi ke zikr se mahfil mein phul khilte the

wo aa gaya hai to sab aankh mal ke dekhte hain

kisi ko aaj ke haalat par qarar nahin

hamare shahr mein sab KHwab kal ke dekhte hain

abhi to lams-e-badan ka hisab baqi hai

ta'alluqat ke pahlu badal ke dekhte hain

na koi nara-e-tahsin-numa na dad-e-suKHan

ki sunne wale bhi tewar ghazal ke dekhte hain

na jaane kab sar-e-aina KHauf likh jae

hum apna chehra bhi 'nami' sanbhal ke dekhte hain