KHud apne aap se ruTha hua hun

ḳhud apne aap se rūThā huā huuñ

samajhte haiñ vo maiñ un se ḳhafā huuñ

haqā.eq se churā kar aañkh apnī

maiñ kin sāyoñ ke pīchhe bhāgtā huuñ

koī to rāsta hogā batānā

tire dil tak pahuñchnā chāhtā huuñ

ba-zāhir hai hañsī hoñToñ pe mere

magar andar se maiñ TuuTā huā huuñ

jahāñ ḳhud ko muqaffal kar rakhā thā

maiñ us kamre kī chābī kho chukā huuñ

ye kis ne mujh ko bas meñ kar liyā hai

ishāroñ par maiñ kis ke chal rahā huuñ

agarche haal hai tārīk merā

sitāra aane vaale vaqt kā huuñ

tapā huuñ ātish-e-daurāñ meñ 'nāyāb'

to ab jā kar kahīñ kundan banā huuñ

KHud apne aap se ruTha hua hun

samajhte hain wo main un se KHafa hun

haqaeq se chura kar aankh apni

main kin sayon ke pichhe bhagta hun

koi to rasta hoga batana

tere dil tak pahunchna chahta hun

ba-zahir hai hansi honTon pe mere

magar andar se main TuTa hua hun

jahan KHud ko muqaffal kar rakha tha

main us kamre ki chabi kho chuka hun

ye kis ne mujh ko bas mein kar liya hai

ishaaron par main kis ke chal raha hun

agarche haal hai tarik mera

sitara aane wale waqt ka hun

tapa hun aatish-e-dauran mein 'nayab'

to ab ja kar kahin kundan bana hun