KHud apne aap se sharmindagi si hoti hai

ḳhud apne aap se sharmindagī sī hotī hai

kabhī kabhī to baḌī be-dilī sī hotī hai

sulagtī dhuup ghanī chāñdnī sī hotī hai

tumhāre saath ye duniyā na.ī sī hotī hai

gale meñ us ke ḳhudā kī ajiib barakat hai

vo boltā hai to ik raushnī sī hotī hai

vo gungunātā hai bele ke phuul khilte haiñ

tamām ghar meñ bichhī chāñdnī sī hotī hai

kiran nikalne se pahle gulāb dekhe haiñ

tumhārī yaad meñ vo tāzgī sī hotī hai

vo muskurātī huī dhuup jaisī āñkhoñ meñ

ghanerī palkoñ ke pīchhe namī sī hotī hai

mirī ġhazal kisī parda-nashīñ kā qissa hai

agar sunā.ūñ to be-pardagī sī hotī hai

maiñ boltā huuñ to ilzām hai baġhāvat kā

maiñ chup rahūñ to baḌī bebasī sī hotī hai

KHud apne aap se sharmindagi si hoti hai

kabhi kabhi to baDi be-dili si hoti hai

sulagti dhup ghani chandni si hoti hai

tumhaare sath ye duniya nai si hoti hai

gale mein us ke KHuda ki ajib barakat hai

wo bolta hai to ek raushni si hoti hai

wo gungunata hai bele ke phul khilte hain

tamam ghar mein bichhi chandni si hoti hai

kiran nikalne se pahle gulab dekhe hain

tumhaari yaad mein wo tazgi si hoti hai

wo muskuraati hui dhup jaisi aankhon mein

ghaneri palkon ke pichhe nami si hoti hai

meri ghazal kisi parda-nashin ka qissa hai

agar sunaun to be-pardagi si hoti hai

main bolta hun to ilzam hai baghawat ka

main chup rahun to baDi bebasi si hoti hai