KHud apne jurm ka mujrim ko etiraf na tha

ḳhud apne jurm kā mujrim ko e'tirāf na thā

magar ye jazba ba-nām-e-junūñ muaaf na thā

pighal to saktā hai lohā nigāh-e-azm to ho

ye pahle qaid kī dīvār meñ shigāf na thā

hasad kī gard thiiñ buġhz aur nafrat kī

mire vajūd pe aisā koī ġhilāf na thā

ulajh rahe haiñ bahut log merī shohrat se

kisī ko yuuñ to koī mujh se iḳhtilāf na thā

tire jamāl se mahfil meñ ab sukūn sā hai

vagarna zehn kisī kā kisī se saaf na thā

mirā nasīb ki kashtī kināre lag na sakī

havā kā jhoñkā to vaise mire ḳhilāf na thā

jadīd lahja ye andāz kis liye 'bekal'

tujhe to husn-e-rivāyat se inhirāf na thā

KHud apne jurm ka mujrim ko e'tiraf na tha

magar ye jazba ba-nam-e-junun muaf na tha

pighal to sakta hai loha nigah-e-azm to ho

ye pahle qaid ki diwar mein shigaf na tha

hasad ki gard thin bughz aur nafrat ki

mere wajud pe aisa koi ghilaf na tha

ulajh rahe hain bahut log meri shohrat se

kisi ko yun to koi mujh se iKHtilaf na tha

tere jamal se mahfil mein ab sukun sa hai

wagarna zehn kisi ka kisi se saf na tha

mera nasib ki kashti kinare lag na saki

hawa ka jhonka to waise mere KHilaf na tha

jadid lahja ye andaz kis liye 'bekal'

tujhe to husn-e-riwayat se inhiraf na tha