KHud fasle hi wasl ki tahrik ho gae

ḳhud fāsle hī vasl kī tahrīk ho ga.e

tum duur ho ke aur bhī nazdīk ho ga.e

jab se chhuTā hai haath tirā mere haath se

sab rāste hayāt ke tārīk ho ga.e

jin rāstoñ pe dauḌ ke ham tum chale the saath

tanhā chale to baal se bārīk ho ga.e

un ke baġhair jiinā bhī ik jurm ho gayā

lamhe tamām māñgī huī bhiik ho ga.e

itnā huā hai un kī masīhā.iyoñ kā zikr

bīmār chīḳh uTThe haiñ ki ham Thiik ho ga.e

ham vo nishāna-e-sitam-e-rozgār haiñ

hañsne chale to paikar-e-taz.hīk ho ga.e

'shā.ir' ne jab bhī chheḌā ḳhulūs-o-vafā kā zikr

chehre tamām yāroñ ke tārīk ho ga.e

KHud fasle hi wasl ki tahrik ho gae

tum dur ho ke aur bhi nazdik ho gae

jab se chhuTa hai hath tera mere hath se

sab raste hayat ke tarik ho gae

jin raston pe dauD ke hum tum chale the sath

tanha chale to baal se barik ho gae

un ke baghair jina bhi ek jurm ho gaya

lamhe tamam mangi hui bhik ho gae

itna hua hai un ki masihaiyon ka zikr

bimar chiKH uTThe hain ki hum Thik ho gae

hum wo nishana-e-sitam-e-rozgar hain

hansne chale to paikar-e-tazhik ho gae

'shair' ne jab bhi chheDa KHulus-o-wafa ka zikr

chehre tamam yaron ke tarik ho gae