KHud ho ke kuchh KHuda se bhi mard-e-KHuda na mang

ḳhud ho ke kuchh ḳhudā se bhī mard-e-ḳhudā na maañg

rasm-e-duā ye hai ki duā le duā na maañg

nādān mā-sivā se na kar iltijā na maañg

māñge ḳhudā se bhī to ḳhudā ke sivā na maañg

maiñ apnī be-zarī kī nadāmat ko kyā kahūñ

tū aur sharmsār na kar ai gadā na maañg

un kā karam bhī dekh le apnā bharam bhī rakh

har mudda.ī se maañg magar mudda.ā na maañg

ḳhūgar ho dard kā ki yahī hai ilāj-e-dard

ye kis ke bas kā rog hai us kī davā na maañg

rasm-e-talab meñ kyā hai samajh kar uThā qadam

aa tujh ko ham batā.eñ ki kyā maañg kyā na maañg

rakkhī huī hai saarī ḳhudā.ī tire liye

haqdār ban ke sāmne aa maañg yā na maañg

is ḳhāk-dān-e-dahr meñ ghuTtā agar hai dam

maqdūr ho to aag lagā de havā na maañg

miltī nahīñ murād to 'nātiq' ḳhayāl chhoḌ

merī salāh ye hai ki tū ruuTh jā na maañg

KHud ho ke kuchh KHuda se bhi mard-e-KHuda na mang

rasm-e-dua ye hai ki dua le dua na mang

nadan ma-siwa se na kar iltija na mang

mange KHuda se bhi to KHuda ke siwa na mang

main apni be-zari ki nadamat ko kya kahun

tu aur sharmsar na kar ai gada na mang

un ka karam bhi dekh le apna bharam bhi rakh

har muddai se mang magar muddaa na mang

KHugar ho dard ka ki yahi hai ilaj-e-dard

ye kis ke bas ka rog hai us ki dawa na mang

rasm-e-talab mein kya hai samajh kar uTha qadam

aa tujh ko hum bataen ki kya mang kya na mang

rakkhi hui hai sari KHudai tere liye

haqdar ban ke samne aa mang ya na mang

is KHak-dan-e-dahr mein ghuTta agar hai dam

maqdur ho to aag laga de hawa na mang

milti nahin murad to 'natiq' KHayal chhoD

meri salah ye hai ki tu ruTh ja na mang