KHud ko aala sifat likh dete

ḳhud ko a.alā sifāt likh dete

kuchh to vo dil kī baat likh dete

dast-e-nāzuk meñ thā qalam un ke

dilkashī-e-hayāt likh dete

dil meñ aa baste aur dil ko mire

hāsil-e-kā.enāt likh dete

kaam lete agar haqīqat se

din ko din shab ko raat likh dete

haath meñ un ke thā varaq saada

ik pasandīda baat likh dete

mujh aziyyat-pasand ke haq meñ

jitnī thiiñ mushkilāt likh dete

shādmānī ko apnā haq likh kar

mere hisse meñ maat likh dete

zau-fishāñ karte merā mustaqbil

kuchh na kuchh iltifāt likh dete

kuchh to maiñ bhī sukūn pā letā

ġham se merī najāt likh dete

aarzī shai hai zindagī ai 'yās'

kaise ham pur-sabāt likh dete

KHud ko aala sifat likh dete

kuchh to wo dil ki baat likh dete

dast-e-nazuk mein tha qalam un ke

dilkashi-e-hayat likh dete

dil mein aa baste aur dil ko mere

hasil-e-kaenat likh dete

kaam lete agar haqiqat se

din ko din shab ko raat likh dete

hath mein un ke tha waraq sada

ek pasandida baat likh dete

mujh aziyyat-pasand ke haq mein

jitni thin mushkilat likh dete

shadmani ko apna haq likh kar

mere hisse mein mat likh dete

zau-fishan karte mera mustaqbil

kuchh na kuchh iltifat likh dete

kuchh to main bhi sukun pa leta

gham se meri najat likh dete

aarzi shai hai zindagi ai 'yas'

kaise hum pur-sabaat likh dete