KHud ko jab KHud se kisi rose rihai dungi

ḳhud ko jab ḳhud se kisī roz rihā.ī dūñgī

maiñ parindoñ kī tarah uḌtī dikhā.ī dūñgī

zindagī tū mujhe kañgan na bhī pahnā be-shak

maiñ tujhe hañste hue phir bhī kalā.ī dūñgī

mo.ajaze lafz mire ḳhalq kareñge aise

chup rahī phir bhī zamāne ko sunā.ī dūñgī

ghar meñ ḳhvāboñ ko lahū kar ke jalā.ūñgī charāġh

dar-o-dīvār ko āñkhoñ kī kamā.ī dūñgī

tum mujhe hijr kī rūdād sunā denā bas

maiñ tumheñ zaḳhm hasīñ ashk tilā.ī dūñgī

āḳhirī baar uThānā hai mujhe dard kā baar

āḳhirī baar mohabbat kī duhā.ī dūñgī

'sa.adiya' ahd buzurgoñ se nibhā.uñgī sadā

haath ko ḳhuun se maiñ rasm-e-hinā.ī dūñgī

KHud ko jab KHud se kisi roz rihai dungi

main parindon ki tarah uDti dikhai dungi

zindagi tu mujhe kangan na bhi pahna be-shak

main tujhe hanste hue phir bhi kalai dungi

moajaze lafz mere KHalq karenge aise

chup rahi phir bhi zamane ko sunai dungi

ghar mein KHwabon ko lahu kar ke jalaungi charagh

dar-o-diwar ko aankhon ki kamai dungi

tum mujhe hijr ki rudad suna dena bas

main tumhein zaKHm hasin ashk tilai dungi

aaKHiri bar uThana hai mujhe dard ka bar

aaKHiri bar mohabbat ki duhai dungi

'sadiya' ahd buzurgon se nibhaungi sada

hath ko KHun se main rasm-e-hinai dungi