KHud ko mumtaz banane ki dili-KHwahish mein

ḳhud ko mumtāz banāne kī dilī-ḳhvāhish meñ

dushman-e-jāñ se milī merī anā sāzish meñ

ruuh raushan na huī aur na dil hī bahlā

vaqt barbād kiyā jism kī ārā.ish meñ

aaj mākūs hai ā.īna-e-ayyām-e-jahāñ

niim meñ rañg-e-hinā zor-e-tapish bārish meñ

ḳhud ko minnat-kash-e-qismat na karo dīda-varo

gulshan-e-shauq ugānā hai tumheñ ātish meñ

dast-basta hai sahar shab kī ijāzat ke liye

ab ke ḳhuddār tabī.at na rahī tābish meñ

pasti-e-fikr-o-nazar vahshat-e-asrār-o-rumūz

ho rahā hai ba-ḳhudā jahl fuzūñ dānish meñ

qabza-e-vaqt meñ jugnū hai sitāra ki sharār

ham faqīroñ kā bhalā hogā na ālā.ish meñ

bāñdh le apnī girah meñ ye nasīhat 'rāhī'

zabt se kaam le nāḳhun na baḌhā ḳhārish meñ

KHud ko mumtaz banane ki dili-KHwahish mein

dushman-e-jaan se mili meri ana sazish mein

ruh raushan na hui aur na dil hi bahla

waqt barbaad kiya jism ki aaraish mein

aaj makus hai aaina-e-ayyam-e-jahan

nim mein rang-e-hina zor-e-tapish barish mein

KHud ko minnat-kash-e-qismat na karo dida-waro

gulshan-e-shauq ugana hai tumhein aatish mein

dast-basta hai sahar shab ki ijazat ke liye

ab ke KHuddar tabiat na rahi tabish mein

pasti-e-fikr-o-nazar wahshat-e-asrar-o-rumuz

ho raha hai ba-KHuda jahl fuzun danish mein

qabza-e-waqt mein jugnu hai sitara ki sharar

hum faqiron ka bhala hoga na aalaish mein

bandh le apni girah mein ye nasihat 'rahi'

zabt se kaam le naKHun na baDha KHarish mein