KHud mein khilte hue manzar se numudar hua

ḳhud meñ khilte hue manzar se numūdār huā

vo jazīra jo samundar se numūdār huā

merī tanhā.ī ne paidā kiye saa.e ghar meñ

koī dīvār koī dar se numūdār huā

chāroñ atrāf mire aa.ine rakkhe ga.e the

maiñ hī maiñ apne barābar se numūdār huā

aaj kī raat guzārī hai diye ne mujh meñ

aaj kā din mire andar se numūdār huā

kyā ajab naqsh hai vo naqsh jo is duniyā ke

kahīñ andar kahīñ bāhar se numūdār huā

ek sho.ale kī lapak nuur meñ Dhal kar aa.ī

ek kirdār bahattar se numūdār huā

haq kī pahchān huī ḳhalq ko 'āzar' us vaqt

jab alī aap ke bistar se numūdār huā

KHud mein khilte hue manzar se numudar hua

wo jazira jo samundar se numudar hua

meri tanhai ne paida kiye sae ghar mein

koi diwar koi dar se numudar hua

chaaron atraf mere aaine rakkhe gae the

main hi main apne barabar se numudar hua

aaj ki raat guzari hai diye ne mujh mein

aaj ka din mere andar se numudar hua

kya ajab naqsh hai wo naqsh jo is duniya ke

kahin andar kahin bahar se numudar hua

ek shoale ki lapak nur mein Dhal kar aai

ek kirdar bahattar se numudar hua

haq ki pahchan hui KHalq ko 'azar' us waqt

jab ali aap ke bistar se numudar hua