KHud se apna aap milaya ja sakta hai

ḳhud se apnā aap milāyā jā saktā hai

tanhā.ī kā haath baTāyā jā saktā hai

ḳhāmoshī jab hamla-āvar honā chāhe

chaurāhe par shor machāyā jā saktā hai

hairānī kā qarz chukānā paḌ jaa.e to

āñkhoñ kā ehsān uThāyā jā saktā hai

dhartī par kuchh sabz rutoñ kā bhes badal kar

charvāhe kā ḳhvāb churāyā jā saktā hai

un kī tiira zulfoñ se tashbīheñ de kar

shab ko rāh-e-rāst pe laayā jā saktā hai

nā-mumkin hai paanī par tasvīr banānā

lekin us par sher banāyā jā saktā hai

bhūlā jā saktā hai ḳhud ko barsoñ barsoñ

roz kisī ko yaad bhī aayā jā saktā hai

KHud se apna aap milaya ja sakta hai

tanhai ka hath baTaya ja sakta hai

KHamoshi jab hamla-awar hona chahe

chaurahe par shor machaya ja sakta hai

hairani ka qarz chukana paD jae to

aankhon ka ehsan uThaya ja sakta hai

dharti par kuchh sabz ruton ka bhes badal kar

charwahe ka KHwab churaya ja sakta hai

un ki tera zulfon se tashbihen de kar

shab ko rah-e-rast pe laya ja sakta hai

na-mumkin hai pani par taswir banana

lekin us par sher banaya ja sakta hai

bhula ja sakta hai KHud ko barson barson

roz kisi ko yaad bhi aaya ja sakta hai