KHud se hua juda to mila martaba tujhe

ḳhud se huā judā to milā martaba tujhe

āzād ho ke mujh se magar kyā milā tujhe

ik lahza apnī aañkh meñ tū jhāñk le agar

aa.uuñ nazar meñ bikhrā huā jā-ba-jā tujhe

thā mujh ko terā pheñkā huā phuul hī bahut

lafzoñ kā ehtimām bhī karnā paḌā tujhe

ye aur baat maiñ ne sadā.eñ hazār diiñ

aa.ī na dasht-e-haul se ik bhī sadā tujhe

tū ne bhī ḳhud ko markaz-e-ālam samajh liyā

lag hī ga.ī zamāne kī āḳhir havā tujhe

kyā qahr hai ki rañgoñ ke is izhdihām meñ

juz rañg-e-zard aur na kuchh bhī milā tujhe

nazroñ ne taar taar kiyā āsmāñ tamām

aa.ī na raas tāroñ bharī ye ridā tujhe

daa.im rahe safar meñ tirā nāqa-e-ḳhayāl

detā rahūñ maiñ roz yahī bad-duā tujhe

kahne ko chand gaam thā ye arsa-e-hayāt

lekin tamām umr hī chalnā paḌā tujhe

KHud se hua juda to mila martaba tujhe

aazad ho ke mujh se magar kya mila tujhe

ek lahza apni aankh mein tu jhank le agar

aaun nazar mein bikhra hua ja-ba-ja tujhe

tha mujh ko tera phenka hua phul hi bahut

lafzon ka ehtimam bhi karna paDa tujhe

ye aur baat main ne sadaen hazar din

aai na dasht-e-haul se ek bhi sada tujhe

tu ne bhi KHud ko markaz-e-alam samajh liya

lag hi gai zamane ki aaKHir hawa tujhe

kya qahr hai ki rangon ke is izhdiham mein

juz rang-e-zard aur na kuchh bhi mila tujhe

nazron ne tar tar kiya aasman tamam

aai na ras taron bhari ye rida tujhe

daim rahe safar mein tera naqa-e-KHayal

deta rahun main roz yahi bad-dua tujhe

kahne ko chand gam tha ye arsa-e-hayat

lekin tamam umr hi chalna paDa tujhe