KHud se to aae na the ahl-e-zamin sunta hai

ḳhud se to aa.e na the ahl-e-zamīñ suntā hai

kyuuñ unheñ bhej ke ab un kī nahīñ suntā hai

ye agar sach hai to phir aaj ise sābit kar

ki sunā hai tū sar-e-arsh-e-barīñ suntā hai

vo jo suntā nahīñ terī to gilā kaisā hai

tū bhī kab us kī mire ḳhāk-nashīñ suntā hai

bigḌe bachche kī tarah shor machā.e jaa.e

ye mirā dil ki kisī kī bhī nahīñ suntā hai

husn ke husn taġhāful se pareshān na ho

ġhaur se baat kahāñ koī hasīñ suntā hai

bhuuk iflās daġhā jurm kī bahutāt 'vasī'

phir bhī lagtā hai tujhe koī kahīñ suntā hai

KHud se to aae na the ahl-e-zamin sunta hai

kyun unhen bhej ke ab un ki nahin sunta hai

ye agar sach hai to phir aaj ise sabit kar

ki suna hai tu sar-e-arsh-e-barin sunta hai

wo jo sunta nahin teri to gila kaisa hai

tu bhi kab us ki mere KHak-nashin sunta hai

bigDe bachche ki tarah shor machae jae

ye mera dil ki kisi ki bhi nahin sunta hai

husn ke husn taghaful se pareshan na ho

ghaur se baat kahan koi hasin sunta hai

bhuk iflas dagha jurm ki bahutat 'wasi'

phir bhi lagta hai tujhe koi kahin sunta hai