KHuda ke fazl se hum haq pe hain baatil se kya nisbat

ḳhudā ke fazl se ham haq pe haiñ bātil se kyā nisbat

hameñ tum se ta.alluq hai mah-e-kāmil se kyā nisbat

mah-e-kan.āñ ko mere is mah-e-kāmil se kyā nisbat

zuleḳhā ke mulavvis dil ko mere dil se kyā nisbat

hama kā ram zi-ḳhud-kāmī ba-badnāmī kashīd āḳhir

kabhī maiñ ne na sochā raaz ko mahfil se kyā nisbat

kahe jaatā hai jo vaa.iz sune jaate haiñ ham lekin

jo ahl-e-dil nahīñ us ko hamāre dil se kyā nisbat

mujhe hai sadma-e-hijrāñ adū ko saikḌoñ ḳhushiyāñ

mire ujḌe hue ghar ko bharī mahfil se kyā nisbat

ḳhudā hī phir bharosa hai ḳhudā hai nāḳhudā merā

vagarna maiñ bhañvar meñ huuñ mujhe sāhil se kyā nisbat

firāq-e-yār meñ merā dil-e-muztar na Thahregā

tumhīñ socho sukūñ ko tā.ir-e-bismil se kyā nisbat

kanīz-e-hazrat-e-mushkil-kushā huuñ dil se maiñ 'parvīñ'

ta.alluq mujh ko āsānī se hai mushkil se kyā nisbat

KHuda ke fazl se hum haq pe hain baatil se kya nisbat

hamein tum se talluq hai mah-e-kaamil se kya nisbat

mah-e-kanan ko mere is mah-e-kaamil se kya nisbat

zuleKHa ke mulawwis dil ko mere dil se kya nisbat

hama ka ram zi-KHud-kaami ba-badnami kashid aaKHir

kabhi main ne na socha raaz ko mahfil se kya nisbat

kahe jata hai jo waiz sune jate hain hum lekin

jo ahl-e-dil nahin us ko hamare dil se kya nisbat

mujhe hai sadma-e-hijran adu ko saikDon KHushiyan

mere ujDe hue ghar ko bhari mahfil se kya nisbat

KHuda hi phir bharosa hai KHuda hai naKHuda mera

wagarna main bhanwar mein hun mujhe sahil se kya nisbat

firaq-e-yar mein mera dil-e-muztar na Thahrega

tumhin socho sukun ko tair-e-bismil se kya nisbat

kaniz-e-hazrat-e-mushkil-kusha hun dil se main 'parwin'

talluq mujh ko aasani se hai mushkil se kya nisbat