KHuda ki kaun si hai rah behtar jaanta hai

ḳhudā kī kaun sī hai raah behtar jāntā hai

maza hai nekiyoñ meñ kyā qalandar jāntā hai

bahut hamdard haiñ mere magar anjān haiñ sab

mire zaḳhmoñ kī hālat ko rafūgar jāntā hai

kisī se maiñ nahīñ kahtā magar merī ġharībī

mirī dīvāroñ kā ukhḌā plastar jāntā hai

kabhī mandir kabhī masjid pe hai is kā baserā

dharam insāniyat kā bas kabūtar jāntā hai

sanam terī judā.ī meñ kaTā hai vaqt mushkil

gine din hijr meñ kitne calendar jāntā hai

kahīñ bhar peT roTī to kahīñ se haath ḳhālī

kisī kī kaisī hai niyyat gadāgar jāntā hai

maiñ pyāsā rah ke bhī minnat nahīñ kartā kisī kī

bahut ḳhuddār huuñ maiñ ye samundar jāntā hai

kisī bhī vaqt ye mazlūm kar deñge baġhāvat

sitam kī ho chukī hai had sitamgar jāntā hai

raheñ arthī se bāhar haath us kā qaul hai ye

na kuchh bhī saath jā.egā sikandar jāntā hai

tumhārī yaad meñ rāteñ kaTī haiñ mushkiloñ se

rahā huuñ kitnā maiñ bechain bistar jāntā hai

na hogā dūsrā paidā jahāñ meñ koī gāñdhī

bahut achchhī tarah se porbandar jāntā hai

yahāñ hai bhiiḌ meñ bhī kis qadar har shaḳhs tanhā

tumhāre shahr kā har ek manzar jāntā hai

'ahad' jiine ko to sab jī rahe haiñ is jahāñ meñ

magar is ziist kā matlab suḳhanvar jāntā hai

KHuda ki kaun si hai rah behtar jaanta hai

maza hai nekiyon mein kya qalandar jaanta hai

bahut hamdard hain mere magar anjaan hain sab

mere zaKHmon ki haalat ko rafugar jaanta hai

kisi se main nahin kahta magar meri gharibi

meri diwaron ka ukhDa plastar jaanta hai

kabhi mandir kabhi masjid pe hai is ka basera

dharam insaniyat ka bas kabutar jaanta hai

sanam teri judai mein kaTa hai waqt mushkil

gine din hijr mein kitne calendar jaanta hai

kahin bhar peT roTi to kahin se hath KHali

kisi ki kaisi hai niyyat gadagar jaanta hai

main pyasa rah ke bhi minnat nahin karta kisi ki

bahut KHuddar hun main ye samundar jaanta hai

kisi bhi waqt ye mazlum kar denge baghawat

sitam ki ho chuki hai had sitamgar jaanta hai

rahen arthi se bahar hath us ka qaul hai ye

na kuchh bhi sath jaega sikandar jaanta hai

tumhaari yaad mein raaten kaTi hain mushkilon se

raha hun kitna main bechain bistar jaanta hai

na hoga dusra paida jahan mein koi gandhi

bahut achchhi tarah se porbandar jaanta hai

yahan hai bhiD mein bhi kis qadar har shaKHs tanha

tumhaare shahr ka har ek manzar jaanta hai

'ahad' jine ko to sab ji rahe hain is jahan mein

magar is zist ka matlab suKHanwar jaanta hai