KHuda ki shan hai in mein agar mehr-o-wafa hoti

ḳhudā kī shaan hai in meñ agar mehr-o-vafā hotī

to phir ye but jidhar hote udhar ḳhalq-e-ḳhudā hotī

jafā vo tark karte gar unheñ qadr-e-vafā hotī

nazar nīchī to jab hotī ki āñkhoñ meñ hayā hotī

hazāroñ gāliyāñ vo de rahe the be-ḳhatā mujh ko

jo pūchhā baat kyā hai jal ke bole baat kyā hotī

tirā va.ada hamārī aarzū bekār haiñ donoñ

jo ye hotā to kyā hotā jo vo hotī to kyā hotī

ḳhudā ne ḳhair kar lī hote hote rah ga.ī hujjat

mirī un kī agar hotī to phir be-intihā hotī

adū kā zikr ḳhud chheḌā hai ḳhud hī mujh se bigḌe haiñ

ġhazab hotā agar merī taraf se ibtidā hotī

na letā naam bhī 'mahmūd' un kāfir butoñ kā tū

samajh gar tujh meñ thoḌī bhī are mard-e-ḳhudā hotī

KHuda ki shan hai in mein agar mehr-o-wafa hoti

to phir ye but jidhar hote udhar KHalq-e-KHuda hoti

jafa wo tark karte gar unhen qadr-e-wafa hoti

nazar nichi to jab hoti ki aankhon mein haya hoti

hazaron galiyan wo de rahe the be-KHata mujh ko

jo puchha baat kya hai jal ke bole baat kya hoti

tera wada hamari aarzu bekar hain donon

jo ye hota to kya hota jo wo hoti to kya hoti

KHuda ne KHair kar li hote hote rah gai hujjat

meri un ki agar hoti to phir be-intiha hoti

adu ka zikr KHud chheDa hai KHud hi mujh se bigDe hain

ghazab hota agar meri taraf se ibtida hoti

na leta nam bhi 'mahmud' un kafir buton ka tu

samajh gar tujh mein thoDi bhi are mard-e-KHuda hoti