KHuda-malum kis ki chand se taswir miTTi ki

ḳhudā-ma.alūm kis kī chāñd se tasvīr miTTī kī

jo goristāñ meñ hasrat hai garebāñ-gīr miTTī kī

navāzī sarfarāzī ruuh ne tasvīr miTTī kī

ḳhushā-tāle ḳhushā-qismat ḳhushā-taqdīr miTTī kī

haqīqat meñ ajā.ib-shobada-pardāz-e-duniyā hai

ki jo insān kī sūrat thā vo hai tasvīr miTTī kī

jise ruuyā meñ dekhā thā milāyā ḳhaak meñ us ne

muqaddar ne hamāre ḳhvāb kī ta.abīr miTTī kī

mazāroñ meñ dikhā kar ustuḳhāñ hasrat ye kahtī hai

koī pursāñ nahīñ un kā ye hai tauqīr miTTī kī

ye nāhaq barhamī hai ḳhāksāroñ ke ġhubāroñ se

ḳharābī āñdhiyoñ ne kī hai be-taqsīr miTTī kī

vo vahshī thā ki mar ke bhī na maidān-e-junūñ chhūTā

mirī mayyat rahī sahrā meñ dāman-gīr miTTī kī

na lī turbat ko gulshan meñ jagah lī bhī to sahrā meñ

riyāzat sab hamārī tū ne ai taqdīr miTTī kī

mire sayyād ne jis jis jagah tuuda banāyā thā

vahāñ jā jā ke bū lete phire naḳhchīr miTTī kī

azal ke roz se ġhash haiñ jo insāñ ḳhāksārī par

sarisht un kī hai miTTī se ye hai tāsīr miTTī kī

ye aalam ho gayā hai jamte jamte gard-e-sahrā.ī

ki majnūñ pūchhtā hai kyā ye hai zanjīr miTTī kī

hamāre ḳhaak ke tuude ko nābūd aa ke kar deñge

nishānī bhī na chhoḌeñge tumhāre tiir miTTī kī

ijāzat se tumhārī guftugū kī sañg-rezo ne

barābar sunñe vāloñ ne sunī taqrīr miTTī kī

galī meñ yaar kī aise hue ho gard-ālūda

ki bilkul ho ga.e ho ai 'sharaf' tasvīr miTTī kī

KHuda-malum kis ki chand se taswir miTTi ki

jo goristan mein hasrat hai gareban-gir miTTi ki

nawazi sarfaraazi ruh ne taswir miTTi ki

KHusha-tale KHusha-qismat KHusha-taqdir miTTi ki

haqiqat mein ajaib-shobada-pardaz-e-duniya hai

ki jo insan ki surat tha wo hai taswir miTTi ki

jise ruya mein dekha tha milaya KHak mein us ne

muqaddar ne hamare KHwab ki tabir miTTi ki

mazaron mein dikha kar ustuKHan hasrat ye kahti hai

koi pursan nahin un ka ye hai tauqir miTTi ki

ye nahaq barhami hai KHaksaron ke ghubaron se

KHarabi aandhiyon ne ki hai be-taqsir miTTi ki

wo wahshi tha ki mar ke bhi na maidan-e-junun chhuTa

meri mayyat rahi sahra mein daman-gir miTTi ki

na li turbat ko gulshan mein jagah li bhi to sahra mein

riyazat sab hamari tu ne ai taqdir miTTi ki

mere sayyaad ne jis jis jagah tuda banaya tha

wahan ja ja ke bu lete phire naKHchir miTTi ki

azal ke roz se ghash hain jo insan KHaksari par

sarisht un ki hai miTTi se ye hai tasir miTTi ki

ye aalam ho gaya hai jamte jamte gard-e-sahrai

ki majnun puchhta hai kya ye hai zanjir miTTi ki

hamare KHak ke tude ko nabud aa ke kar denge

nishani bhi na chhoDenge tumhaare tir miTTi ki

ijazat se tumhaari guftugu ki sang-rezo ne

barabar sunne walon ne suni taqrir miTTi ki

gali mein yar ki aise hue ho gard-aluda

ki bilkul ho gae ho ai 'sharaf' taswir miTTi ki