KHudi ho ilm se mohkam to ghairat-e-jibril

ḳhudī ho ilm se mohkam to ġhairat-e-jibrīl

agar ho ishq se mohkam to sūr-e-isrāfīl

azāb-e-dānish-e-hāzir se bā-ḳhabar huuñ maiñ

ki maiñ is aag meñ Daalā gayā huuñ misl-e-ḳhalīl

fareb-ḳhurda-e-manzil hai kārvāñ varna

ziyāda rāhat-e-manzil se hai nashāt-e-rahīl

nazar nahīñ to mire halqa-e-suḳhan meñ na baiTh

ki nukta-hā-e-ḳhudī haiñ misāl-e-teġh-e-asīl

mujhe vo dars-e-farñg aaj yaad aate haiñ

kahāñ huzūr kī lazzat kahāñ hijāb-e-dalīl

añdherī shab hai judā apne qāfile se hai tū

tire liye hai mirā shola-e-navā qindīl

ġharīb o saada o rañgīñ hai dāstān-e-haram

nihāyat is kī husain ibtidā hai ismā.īl

KHudi ho ilm se mohkam to ghairat-e-jibril

agar ho ishq se mohkam to sur-e-israfil

azab-e-danish-e-hazir se ba-KHabar hun main

ki main is aag mein Dala gaya hun misl-e-KHalil

fareb-KHurda-e-manzil hai karwan warna

ziyaada rahat-e-manzil se hai nashat-e-rahil

nazar nahin to mere halqa-e-suKHan mein na baiTh

ki nukta-ha-e-KHudi hain misal-e-tegh-e-asil

mujhe wo dars-e-farng aaj yaad aate hain

kahan huzur ki lazzat kahan hijab-e-dalil

andheri shab hai juda apne qafile se hai tu

tere liye hai mera shola-e-nawa qindil

gharib o sada o rangin hai dastan-e-haram

nihayat is ki husain ibtida hai ismail