KHudi ka raazdan ho kar KHudi ki dastan ho ja

ḳhudī kā rāzdāñ ho kar ḳhudī kī dāstāñ ho jā

jahāñ se kyā ġharaz tujh ko tū aap apnā jahāñ ho jā

bayān-e-pā.emālī shikva-e-barq-e-tapāñ ho jā

gulistān-e-jahāñ ke patte patte kī zabāñ ho jā

sharīk-e-kārvāñ hone kī go tāqat nahīñ tujh meñ

magar itnī to himmat kar ki gard-e-kārvāñ ho jā

tazalzul se barī ho terā istiqlāl ulfat meñ

yaqīn-e-pur-yaqīñ ho jā gumān-e-be-gumāñ ho jā

kisī sūrat to sharh-e-ārzū-e-shauq karnī hai

zabāñ chup hai agar ai dil to aap apnī zabāñ ho jā

zamāne par bharosā kar na rāz-e-ishq kā ai dil

jahāñ tak ho sake tū aap apnā rāz-dāñ ho jā

tujhe dāġhoñ ke lākhoñ māh-o-anjum mil hī jā.eñge

uTh ai dard-e-dil-e-pur-āh uTh kar āsmāñ ho jā

kabhī to aarzī sā ik tabassum lab pe aane de

kabhī to mehrbāñ mujh par mire nā-mehrbāñ ho jā

tire aane pe ai tīr-e-nigāh-e-nāz maiñ ḳhush huuñ

dil-e-betāb meñ aa kar hisāb-e-dostāñ ho jā

bulandī naam se ai 'arsh' mil saktī nahīñ tujh ko

zamīn-e-sher par auj-e-suḳhan se āsmāñ ho jā

KHudi ka raazdan ho kar KHudi ki dastan ho ja

jahan se kya gharaz tujh ko tu aap apna jahan ho ja

bayan-e-paemali shikwa-e-barq-e-tapan ho ja

gulistan-e-jahan ke patte patte ki zaban ho ja

sharik-e-karwan hone ki go taqat nahin tujh mein

magar itni to himmat kar ki gard-e-karwan ho ja

tazalzul se bari ho tera istiqlal ulfat mein

yaqin-e-pur-yaqin ho ja guman-e-be-guman ho ja

kisi surat to sharh-e-arzu-e-shauq karni hai

zaban chup hai agar ai dil to aap apni zaban ho ja

zamane par bharosa kar na raaz-e-ishq ka ai dil

jahan tak ho sake tu aap apna raaz-dan ho ja

tujhe daghon ke lakhon mah-o-anjum mil hi jaenge

uTh ai dard-e-dil-e-pur-ah uTh kar aasman ho ja

kabhi to aarzi sa ek tabassum lab pe aane de

kabhi to mehrban mujh par mere na-mehrban ho ja

tere aane pe ai tir-e-nigah-e-naz main KHush hun

dil-e-betab mein aa kar hisab-e-dostan ho ja

bulandi nam se ai 'arsh' mil sakti nahin tujh ko

zamin-e-sher par auj-e-suKHan se aasman ho ja