KHudi ko bhul kar maine kise mahbub tha jaana

ḳhudī ko bhuul kar maiñ ne kise mahbūb thā jaanā

mohabbat ke jo laa.iq hai vo hastī maiñ na pahchānā

ki jis ko ishq kahte haiñ koī qābil nahīñ us ke

bhalā jaanā to bas ishq-e-haqīqī ko bhalā jaanā

kahīñ farhād shīrīñ the kahīñ lailā kahīñ thā qais

anal-haq kyoñ kahā mansūr ne koī bhī na jaanā

bhulā kar zaat vo jis ko hī hai bas iḳhtiyār-e-kun

fir.aunī zaat ke logoñ ne ḳhud ko hī ḳhudā jaanā

kudūrat se bhare dil haiñ magar da.ave mohabbat ke

so aise buz-diloñ ke dil ko nafrat kā qila jaanā

ye hañste chehre dhokā haiñ ye ḳhushiyoñ kī banāvaT haiñ

ye shahr ābād dikhte haiñ haqīqat meñ hai vīrānā

bahaknā us ko kahte haiñ to saaqī aur de mujh ko

haq-o-bātil jo samjhā de bhale ho kyoñ na mai-ḳhāna

nafī kar zaat kī 'ātir' ki saudā bhī nafe' kā hai

jo paayā vo hī afzal hai jo khoyā vo bhī pahchānā

KHudi ko bhul kar main ne kise mahbub tha jaana

mohabbat ke jo laiq hai wo hasti main na pahchana

ki jis ko ishq kahte hain koi qabil nahin us ke

bhala jaana to bas ishq-e-haqiqi ko bhala jaana

kahin farhad shirin the kahin laila kahin tha qais

anal-haq kyon kaha mansur ne koi bhi na jaana

bhula kar zat wo jis ko hi hai bas iKHtiyar-e-kun

firauni zat ke logon ne KHud ko hi KHuda jaana

kudurat se bhare dil hain magar dawe mohabbat ke

so aise buz-dilon ke dil ko nafrat ka qila jaana

ye hanste chehre dhoka hain ye KHushiyon ki banawaT hain

ye shahr aabaad dikhte hain haqiqat mein hai virana

bahakna us ko kahte hain to saqi aur de mujh ko

haq-o-baatil jo samjha de bhale ho kyon na mai-KHana

nafi kar zat ki 'atir' ki sauda bhi nafe' ka hai

jo paya wo hi afzal hai jo khoya wo bhi pahchana