khul ke barasna aur baras kar phir khul jaana dekha hai

khul ke barasnā aur baras kar phir khul jaanā dekhā hai

ham se pūchho!! un āñkhoñ kā ek zamāna dekhā hai

tum ne kaise maan liyā vo thak kar baiTh gayā hogā

tum ne to ḳhud apnī āñkhoñ se vo dīvānā dekhā hai

manzil tak pahuñcheñ ki na pahuñcheñ raah magar apnī hogī

tū rahne de vaa.iz terā raah batānā dekhā hai

dhuul kā ik zarra na uḌe āvāz kare parchhā.īñ bhī

maut bhī aa kar martī nahīñ thī vo vīrāna dekhā hai

gulshan se ham siikh na paa.e vaqtī ḳhushiyoñ ko jiinā

jabki ham ne fasl-e-gul kā aanā jaanā dekhā hai

dil to saada hai terī har baat ko sachchā māntā hai

aql ne bāteñ karte terā aañkh churānā dekhā hai

lafz davā hai lekin is ke saath hī kuchh parhez bhī hai

lafz ke baa.is pal meñ khonā pal meñ paanā dekhā hai

khul ke barasna aur baras kar phir khul jaana dekha hai

hum se puchho!! un aankhon ka ek zamana dekha hai

tum ne kaise man liya wo thak kar baiTh gaya hoga

tum ne to KHud apni aankhon se wo diwana dekha hai

manzil tak pahunchen ki na pahunchen rah magar apni hogi

tu rahne de waiz tera rah batana dekha hai

dhul ka ek zarra na uDe aawaz kare parchhain bhi

maut bhi aa kar marti nahin thi wo virana dekha hai

gulshan se hum sikh na pae waqti KHushiyon ko jina

jabki hum ne fasl-e-gul ka aana jaana dekha hai

dil to sada hai teri har baat ko sachcha manta hai

aql ne baaten karte tera aankh churana dekha hai

lafz dawa hai lekin is ke sath hi kuchh parhez bhi hai

lafz ke bais pal mein khona pal mein pana dekha hai