khula hai jalwa-e-pinhan se az-bas chaak wahshat ka

khulā hai jalva-e-pinhāñ se az-bas chaak vahshat kā

maiñ Dartā huuñ kahīñ parda na phaT jaa.e haqīqat kā

kahāñ le jā.egā yārab samand-e-tund vahshat kā

ki pīchhe rah gayā kosoñ dorāhā nār-o-jannat kā

ġhubār-e-rañg-e-parrāñ hai pharerā terī rāyat kā

shikast-e-qalb-e-āshiq ġhalġhala hai terī nusrat kā

kiyā hai qasd kis ke kañgur-e-aivān-e-rif.at kā

ki thāmā hai tire naale ne paaya arsh-e-himmat kā

jhukā dī qudsiyoñ ne be-takalluf gardan-e-tā.at

zahe-rutba kaf-e-ḳhāk-e-dar-e-vālā-e-daulat kā

khule kis tarah parda parda-e-gosh-e-tahayyur par

ki be-saut-o-sadā hai parda sāz-e-bazm-e-vahdat kā

sanam tāq-e-haram se daf.atan nīche utar aa.e

adab thā bas ki vājib dost ke qāsid ke tal.at kā

hijāb-e-tan kasād-e-raunaq-e-kālā-e-yūsuf hai

taraddud kyā hai zindāñ-ḳhāna-e-hijrāñ se hijrat kā

salātīñ ko nahīñ paatā mizāj un ke faqīroñ kā

ki anqā-e-falak-parvāz hai qāf-e-qanā.at kā

lab-e-asnām haiñ qand-e-suḳhan se sar-ba-mohr ab tak

ḳhamoshī se maza pūchhe koī terī fasāhat kā

maze milte haiñ kyā kyā ishq ke lazzat-shanāsoñ ko

hameñ dāmān-e-zaḳhm-e-dil evaz hai ḳhvān-e-ne.amat kā

tire hairat-kade meñ farsh hai ā.īna kyā o but

ki ḳhāsān-e-dar-e-daulat ko hī khaTkā hai zillat kā

nigah be-his ḳhat-e-sāġhar kī sūrat hai ki saaqī ne

diyā hai mardum-e-chashm-e-jahāñ ko jaam hairat kā

talāsh-e-jalva-e-mānī meñ Takrāyā kiye sajde

na TuuTā dast-e-ḳhushk-e-zohd se but-ḳhāna sūrat kā

qayāmat barhamī Daalī to hijrāñ kī ghaḌī guzrī

zamīñ hai gard shīsha āsmāñ shīsha hai sā'at kā

butoñ par laat maarī mehr-o-mah se pher liiñ āñkheñ

'bayāñ' allāh re ġhamza mire husn-e-aqīdat kā

khula hai jalwa-e-pinhan se az-bas chaak wahshat ka

main Darta hun kahin parda na phaT jae haqiqat ka

kahan le jaega yarab samand-e-tund wahshat ka

ki pichhe rah gaya koson doraha nar-o-jannat ka

ghubar-e-rang-e-parran hai pharera teri rayat ka

shikast-e-qalb-e-ashiq ghalghala hai teri nusrat ka

kiya hai qasd kis ke kangur-e-aiwan-e-rifat ka

ki thama hai tere nale ne paya arsh-e-himmat ka

jhuka di qudsiyon ne be-takalluf gardan-e-taat

zahe-rutba kaf-e-KHak-e-dar-e-wala-e-daulat ka

khule kis tarah parda parda-e-gosh-e-tahayyur par

ki be-saut-o-sada hai parda saz-e-bazm-e-wahdat ka

sanam taq-e-haram se dafatan niche utar aae

adab tha bas ki wajib dost ke qasid ke talat ka

hijab-e-tan kasad-e-raunaq-e-kala-e-yusuf hai

taraddud kya hai zindan-KHana-e-hijran se hijrat ka

salatin ko nahin pata mizaj un ke faqiron ka

ki anqa-e-falak-parwaz hai qaf-e-qanaat ka

lab-e-asnam hain qand-e-suKHan se sar-ba-mohr ab tak

KHamoshi se maza puchhe koi teri fasahat ka

maze milte hain kya kya ishq ke lazzat-shanason ko

hamein daman-e-zaKHm-e-dil ewaz hai KHwan-e-neamat ka

tere hairat-kade mein farsh hai aaina kya o but

ki KHasan-e-dar-e-daulat ko hi khaTka hai zillat ka

nigah be-his KHat-e-saghar ki surat hai ki saqi ne

diya hai mardum-e-chashm-e-jahan ko jam hairat ka

talash-e-jalwa-e-mani mein Takraya kiye sajde

na TuTa dast-e-KHushk-e-zohd se but-KHana surat ka

qayamat barhami Dali to hijran ki ghaDi guzri

zamin hai gard shisha aasman shisha hai sa'at ka

buton par lat mari mehr-o-mah se pher lin aankhen

'bayan' allah re ghamza mere husn-e-aqidat ka