khula hai zist ka ek KHushnuma waraq phir se

khulā hai ziist kā ik ḳhushnumā varaq phir se

havā-e-shauq ne kī hai yahāñ pe daq phir se

pukārtā hai mujhe kaun mere maazī se

ki aaj ruḳh pe mire chhā ga.ī shafaq phir se

ḳhafā ḳhafā se haiñ āḳhir janāb-e-nāseh kyuuñ

kisī ne kar diyā kyā aaj zikr-e-haq phir se

kisī se ruuTh ga.e yā kisī kā dil toḌā

jabīñ pe aa gayā kyuuñ aap kī araq phir se

miyān-e-dil koī letī hai Tiis añgḌā.ī

vahī hai rañj vahī ġham vahī qalaq phir se

na niklo chāñdnī rātoñ meñ kitnī baar kahā

huā hai chāñd ke chehre kā rañg faq phir se

bas ek tajraba kaafī hai zindagī ke liye

paḌhā na jā.egā ham se vahī sabaq phir se

yahī nizām-e-zamāna yahī taġhayyur hai

jo sahl hai vahī ho jā.egā adaq phir se

kahīñ qarīb hī bādal baraste haiñ 'ālok'

havā.eñ laa.ī haiñ ḳhunkī kī kuchh ramaq phir se

khula hai zist ka ek KHushnuma waraq phir se

hawa-e-shauq ne ki hai yahan pe daq phir se

pukarta hai mujhe kaun mere mazi se

ki aaj ruKH pe mere chha gai shafaq phir se

KHafa KHafa se hain aaKHir janab-e-naseh kyun

kisi ne kar diya kya aaj zikr-e-haq phir se

kisi se ruTh gae ya kisi ka dil toDa

jabin pe aa gaya kyun aap ki araq phir se

miyan-e-dil koi leti hai Tis angDai

wahi hai ranj wahi gham wahi qalaq phir se

na niklo chandni raaton mein kitni bar kaha

hua hai chand ke chehre ka rang faq phir se

bas ek tajraba kafi hai zindagi ke liye

paDha na jaega hum se wahi sabaq phir se

yahi nizam-e-zamana yahi taghayyur hai

jo sahl hai wahi ho jaega adaq phir se

kahin qarib hi baadal baraste hain 'alok'

hawaen lai hain KHunki ki kuchh ramaq phir se