khuli hai aankh haqiqat ki intiqal ke baad

khulī hai aañkh haqīqat kī intiqāl ke baad

maiñ zindagī tujhe samjhā huuñ dekh-bhāl ke baad

tū merī ruuh mirā ishq hai niDar ho jā

shajar nahīñ huuñ ki badlūñ libās saal ke baad

mire adū ke irāde tamām ḳhaak hue

jab aur ijz meñ aaya maiñ ishti.āl ke baad

tirī judā.ī ke sadme ne kar diyā pāgal

rahā malāl na koī tire malāl ke baad

tum is tarah se agar hausla baḌhāte rahe

baḌe kamāl karūñgā maiñ is kamāl ke baad

phir us kī āñkheñ nadāmat ke ashk le Duube

dil-e-tabāh se uThte hue savāl ke baad

tire junūñ ne tujhe surḳh-rū kiyā 'nāzish'

tujhe uruuj milā zabt-e-be-misāl ke baad

khuli hai aankh haqiqat ki intiqal ke baad

main zindagi tujhe samjha hun dekh-bhaal ke baad

tu meri ruh mera ishq hai niDar ho ja

shajar nahin hun ki badlun libas sal ke baad

mere adu ke irade tamam KHak hue

jab aur ijz mein aaya main ishtial ke baad

teri judai ke sadme ne kar diya pagal

raha malal na koi tere malal ke baad

tum is tarah se agar hausla baDhate rahe

baDe kamal karunga main is kamal ke baad

phir us ki aankhen nadamat ke ashk le Dube

dil-e-tabah se uThte hue sawal ke baad

tere junun ne tujhe surKH-ru kiya 'nazish'

tujhe uruj mila zabt-e-be-misal ke baad