khuli hai kunj-e-qafas mein meri zaban sayyaad

khulī hai kunj-e-qafas meñ mirī zabāñ sayyād

maiñ mājrā-e-chaman kyā karūñ bayāñ sayyād

dikhā.egā na agar sair-e-bostāñ sayyād

phaḌak phaḌak ke qafas hī meñ dūñgā jaañ sayyād

jahāñ gayā maiñ gayā le ke daam vaañ sayyād

phirā talāsh meñ merī kahāñ kahāñ sayyād

dikhāyā kunj-e-qafas mujh ko āb-o-dāna ne

vagarna daam kahāñ maiñ kahāñ kahāñ sayyād

ujāḌā mausam-e-gul hī meñ āshiyāñ merā

ilāhī TuuT paḌe tujh pe āsmāñ sayyād

maiñ khīñchūñ daam meñ bulbul tū āshiyāna jalā

baham ye mashvara karte haiñ bāġhbāñ sayyād

ajiib qissa hai dilchasp ik hikāyat hai

sunā.ūñgā gul-o-bulbul kī dāstāñ sayyād

na gul khileñge na chahkāregā koī bulbul

bahār-e-bāġh ko hone to de ḳhizāñ sayyād

humā-e-zinda ghasītegā daam meñ shāyad

bajā-e-dāna bichhātā hai ustuḳhvāñ sayyād

ḳhabar nahīñ kise kahte haiñ gul chaman kaisā

qafas ko jānte haiñ ham to āshiyāñ sayyād

udaas dekh ke mujh ko chaman dikhātā hai

ka.ī baras meñ huā hai mizāj-dāñ sayyād

rahe na qabil-e-parvāz bāl-o-par mere

qafas se uḌ ke maiñ ab jā.uñgā kahāñ sayyād

qafas ko shaam se laTkā ke farsh-e-ḳhvāb ke paas

sunā kiyā mirī tā-sub.h dāstāñ sayyād

karegā yaad mire zamzamoñ ko ba.ad mire

huuñ chand roz tere ghar meñ mehmāñ sayyād

sunā.ūñ vāqi.a apnā tujhe tamām-o-kamāl

jo gosh-e-dil se sune merī dāstāñ sayyād

sitam ziyāda na kar hukm de rihā.ī kā

pukārte haiñ giraftār al-amāñ sayyād

chaman meñ rakkhā na bulbul kā naam tak baaqī

ḳhudā kare yūñhī ho jaa.e be-nishāñ sayyād

hazār murġh-e-ḳhush-ilhāñ chahakte haiñ harsū

beh-az-chaman huā ab to tirā makān sayyād

maiñ jhāñktā nahīñ chāk-e-qafas se bhī gul ko

na-hove tā mirī jānib se bad-gumāñ sayyād

asīr-e-kunj-e-qafas kar ba-shauq daam meñ khīñch

qazā le aa.ī hai mujh ko kashāñ kashāñ sayyād

paroñ ko khol de zālim jo band kartā hai

qafas ko le ke maiñ uḌ jā.ūñgā kahāñ sayyād

na hūñgā band qafas meñ bhī maiñ vo bulbul huuñ

hazār tujh ko sunā.ūñgā dāstāñ sayyād

dar-e-qafas bhī khulegā to ab na jā.ūñgā

yaqīn na hove to kar merā imtihāñ sayyād

rihā bhī ho ke na bhūlūñgā haqq-e-ḳhidmat ko

adā-e-shukr karūñgā maiñ har zabāñ sayyād

chaman meñ bulbul-o-qumrī kā par na chhoḌegā

rahā jab āTh-pahar ghaat meñ nihāñ sayyād

qafas pe rakhne lagā ab to haar phūloñ ke

hazār shukr huā mujh pe mehrbāñ sayyād

aziiz rakhtā hai kartā hai ḳhātireñ merī

milā hai ḳhūbī-e-qismat se qadr-dāñ sayyād

nikāliyo na qadam āshiyāñ se o bulbul

lagā.e baiThe haiñ phande jahāñ-tahāñ sayyād

vo andalīb huuñ jal kar karūñ jo nāla-e-garm

qafas ke chākoñ se uThne lage dhuāñ sayyād

mire bayān ko sun sun ke kaañp kaañp uThā

ġhazab ye hai ki samajhtā nahīñ zabāñ sayyād

ilāhī dekhiye kyūñkar nibāh hotā hai

zabāñ-darāz huuñ maiñ aur bad-zabāñ sayyād

sivā-e-shukr shikāyat agar kabhī kī ho

ilāhī qat.a ho minqār se zabāñ sayyād

fareb-e-dāna na khātā maiñ zīnhār ai 'rind'

na kartā daam agar ḳhaak meñ nihāñ sayyād

khuli hai kunj-e-qafas mein meri zaban sayyaad

main majra-e-chaman kya karun bayan sayyaad

dikhaega na agar sair-e-bostan sayyaad

phaDak phaDak ke qafas hi mein dunga jaan sayyaad

jahan gaya main gaya le ke dam wan sayyaad

phira talash mein meri kahan kahan sayyaad

dikhaya kunj-e-qafas mujh ko aab-o-dana ne

wagarna dam kahan main kahan kahan sayyaad

ujaDa mausam-e-gul hi mein aashiyan mera

ilahi TuT paDe tujh pe aasman sayyaad

main khinchun dam mein bulbul tu aashiyana jala

baham ye mashwara karte hain baghban sayyaad

ajib qissa hai dilchasp ek hikayat hai

sunaunga gul-o-bulbul ki dastan sayyaad

na gul khilenge na chahkarega koi bulbul

bahaar-e-bagh ko hone to de KHizan sayyaad

huma-e-zinda ghasitega dam mein shayad

baja-e-dana bichhata hai ustuKHwan sayyaad

KHabar nahin kise kahte hain gul chaman kaisa

qafas ko jaante hain hum to aashiyan sayyaad

udas dekh ke mujh ko chaman dikhata hai

kai baras mein hua hai mizaj-dan sayyaad

rahe na qabil-e-parwaz baal-o-par mere

qafas se uD ke main ab jaunga kahan sayyaad

qafas ko sham se laTka ke farsh-e-KHwab ke pas

suna kiya meri ta-subh dastan sayyaad

karega yaad mere zamzamon ko baad mere

hun chand roz tere ghar mein mehman sayyaad

sunaun waqia apna tujhe tamam-o-kamal

jo gosh-e-dil se sune meri dastan sayyaad

sitam ziyaada na kar hukm de rihai ka

pukarte hain giraftar al-aman sayyaad

chaman mein rakkha na bulbul ka nam tak baqi

KHuda kare yunhi ho jae be-nishan sayyaad

hazar murgh-e-KHush-ilhan chahakte hain harsu

beh-az-chaman hua ab to tera makan sayyaad

main jhankta nahin chaak-e-qafas se bhi gul ko

na-howe ta meri jaanib se bad-guman sayyaad

asir-e-kunj-e-qafas kar ba-shauq dam mein khinch

qaza le aai hai mujh ko kashan kashan sayyaad

paron ko khol de zalim jo band karta hai

qafas ko le ke main uD jaunga kahan sayyaad

na hunga band qafas mein bhi main wo bulbul hun

hazar tujh ko sunaunga dastan sayyaad

dar-e-qafas bhi khulega to ab na jaunga

yaqin na howe to kar mera imtihan sayyaad

riha bhi ho ke na bhulunga haqq-e-KHidmat ko

ada-e-shukr karunga main har zaban sayyaad

chaman mein bulbul-o-qumri ka par na chhoDega

raha jab aaTh-pahar ghat mein nihan sayyaad

qafas pe rakhne laga ab to haar phulon ke

hazar shukr hua mujh pe mehrban sayyaad

aziz rakhta hai karta hai KHatiren meri

mila hai KHubi-e-qismat se qadr-dan sayyaad

nikaliyo na qadam aashiyan se o bulbul

lagae baiThe hain phande jahan-tahan sayyaad

wo andalib hun jal kar karun jo nala-e-garm

qafas ke chaakon se uThne lage dhuan sayyaad

mere bayan ko sun sun ke kanp kanp uTha

ghazab ye hai ki samajhta nahin zaban sayyaad

ilahi dekhiye kyunkar nibah hota hai

zaban-daraaz hun main aur bad-zaban sayyaad

siwa-e-shukr shikayat agar kabhi ki ho

ilahi qata ho minqar se zaban sayyaad

fareb-e-dana na khata main zinhaar ai 'rind'

na karta dam agar KHak mein nihan sayyaad