khulta nahin hai raaz hamare bayan se

khultā nahīñ hai raaz hamāre bayān se

lete haiñ dil kā kaam ham apnī zabān se

kyā lazzat-e-visāl adā ho bayān se

sab harf chipke jaate haiñ merī zabān se

mash.hūr rāz-e-ishq hai kis ke bayān se

merī zabān se ki tumhārī zabān se

fitna banā zamīn pe har zarra ḳhaak kā

nikle haiñ bahr-e-sair vo jis dam makān se

us din se mujh ko niiñd na aa.ī tamām umr

ik shab milī thī aañkh tire pāsbān se

ye ḳhaak meñ milā.e to vo ho sitam-sharīk

mujh ko zamīñ se laag unheñ āsmān se

lenā sambhālnā ki mire hosh uḌ chale

aatā hai koī mast qayāmat kī shaan se

mujh se nazar milā ke tum abrū meñ bal na do

sīdhā chalegā tiir na TeḌhī kamān se

bāzār-e-ishq meñ haiñ bahut dil jagah jagah

dekheñ vo mol lete haiñ kis kī dukān se

shorīda-sar vo huuñ ki use sar se toḌ duuñ

gar sañg-e-hādsa bhī gire āsmān se

arzāñ kare faroḳht agar mai-farosh-e-ishq

lene lageñ farishte bhī us kī dukān se

guzrī hai āzmā.ish-e-mahr-o-vafā meñ umr

fursat mujhe milī na kabhī imtihān se

dil bhī bachā jigar bhī bachā ḳhair ho ga.ī

tīr-e-nigāh paar huā darmiyān se

maiñ tum ko nāgavār huuñ dil mujh ko nāgavār

tum mujh se tañg aur huuñ maiñ tañg jaan se

haañ haañ tirā raqīb se be-shak hai rabt-zabt

rutba yaqīn kā hai ziyāda gumān se

mehr-o-vafā kā naam hai ab baat baat par

ye sun liyā hai aap ne kis kī zabān se

kaisā khilā hai phuul jab aayā bahār par

pūchhe to koī lutf-e-javānī javān se

dānista aate jātoñ se laḌtā hai raat din

phir ho paḌī thī aaj tire pāsbān se

is ḳhūb-rū ko bazm-e-hasīnāñ meñ dekhiye

kartā hai ān-bān baḌī ān-tān se

ai 'dāġh' is kī ḳhair manātā hai aadmī

koī aziiz baḌh ke nahīñ apnī jaan se

khulta nahin hai raaz hamare bayan se

lete hain dil ka kaam hum apni zaban se

kya lazzat-e-visal ada ho bayan se

sab harf chipke jate hain meri zaban se

mashhur raaz-e-ishq hai kis ke bayan se

meri zaban se ki tumhaari zaban se

fitna bana zamin pe har zarra KHak ka

nikle hain bahr-e-sair wo jis dam makan se

us din se mujh ko nind na aai tamam umr

ek shab mili thi aankh tere pasban se

ye KHak mein milae to wo ho sitam-sharik

mujh ko zamin se lag unhen aasman se

lena sambhaalna ki mere hosh uD chale

aata hai koi mast qayamat ki shan se

mujh se nazar mila ke tum abru mein bal na do

sidha chalega tir na TeDhi kaman se

bazar-e-ishq mein hain bahut dil jagah jagah

dekhen wo mol lete hain kis ki dukan se

shorida-sar wo hun ki use sar se toD dun

gar sang-e-hadsa bhi gire aasman se

arzan kare faroKHt agar mai-farosh-e-ishq

lene lagen farishte bhi us ki dukan se

guzri hai aazmaish-e-mahr-o-wafa mein umr

fursat mujhe mili na kabhi imtihan se

dil bhi bacha jigar bhi bacha KHair ho gai

tir-e-nigah par hua darmiyan se

main tum ko nagawar hun dil mujh ko nagawar

tum mujh se tang aur hun main tang jaan se

han han tera raqib se be-shak hai rabt-zabt

rutba yaqin ka hai ziyaada guman se

mehr-o-wafa ka nam hai ab baat baat par

ye sun liya hai aap ne kis ki zaban se

kaisa khila hai phul jab aaya bahaar par

puchhe to koi lutf-e-jawani jawan se

danista aate jaton se laDta hai raat din

phir ho paDi thi aaj tere pasban se

is KHub-ru ko bazm-e-hasinan mein dekhiye

karta hai aan-ban baDi aan-tan se

ai 'dagh' is ki KHair manata hai aadmi

koi aziz baDh ke nahin apni jaan se