KHulus apna liye milte hain fankari nahin karte

ḳhulūs apnā liye milte haiñ fankārī nahīñ karte

ham apne dostoñ ke saath makkārī nahīñ karte

luTā dete haiñ jān-o-dil mohabbat karne vāloñ par

kabhī ham jazb-e-ulfat kī ḳharīdārī nahīñ karte

jinheñ aadat hai girgiT kī tarah rangat badalne kī

vo apne dostoñ se bhī vafādārī nahīñ karte

hamārā sar kabhī jhuktā nahīñ hai ġhair ke aage

kabhī ham iḳhtiyār andāz-e-darbārī nahīñ karte

hamesha jhuuT se laḌtā rahā huuñ maiñ tan-e-tanhā

jo sachche log haiñ merī taraf-dārī nahīñ karte

lahū de kar jise shādāb karnā apnā maslak hai

ham apne desh kī miTTī se ġhaddārī nahīñ karte

matānat se 'sa.īd' apnī ġhazal ko pesh karte haiñ

adākārī nahīñ aatī adākārī nahīñ karte

KHulus apna liye milte hain fankari nahin karte

hum apne doston ke sath makkari nahin karte

luTa dete hain jaan-o-dil mohabbat karne walon par

kabhi hum jazb-e-ulfat ki KHaridari nahin karte

jinhen aadat hai girgiT ki tarah rangat badalne ki

wo apne doston se bhi wafadari nahin karte

hamara sar kabhi jhukta nahin hai ghair ke aage

kabhi hum iKHtiyar andaz-e-darbari nahin karte

hamesha jhuT se laDta raha hun main tan-e-tanha

jo sachche log hain meri taraf-dari nahin karte

lahu de kar jise shadab karna apna maslak hai

hum apne desh ki miTTi se ghaddari nahin karte

matanat se 'said' apni ghazal ko pesh karte hain

adakari nahin aati adakari nahin karte