KHulus-e-sajda har ek haal mein muqaddam hai

ḳhulūs-e-sajda har ik haal meñ muqaddam hai

vahīñ pe dil bhī jhukā de jahāñ jabīñ ḳham hai

hazār jalvoñ se pur-nūr bazm-e-ālam hai

magar charāġh-e-mohabbat kī raushnī kam hai

hamāre hāl-e-pareshāñ pe muskurā denā

baḌā latīf ye andāz-e-pursish-e-ġham hai

hayāt-e-ishq umīdoñ pe kāTne vaalo

ḳhabar bhī hai ki umīdoñ kī zindagī kam hai

qafas meñ the to chaman ke liye taḌapte the

chaman meñ aa.e to ahl-e-chaman kā mātam hai

bashar ke dar pe jabīn-e-bashar kā jhuk jaanā

qasam ḳhudā kī ye tauhīn-e-ibn-e-ādam hai

vo dil churā ke nigāhoñ se chhup ga.e 'shārib'

nigāh-o-dil se magar fāsla bahut kam hai

KHulus-e-sajda har ek haal mein muqaddam hai

wahin pe dil bhi jhuka de jahan jabin KHam hai

hazar jalwon se pur-nur bazm-e-alam hai

magar charagh-e-mohabbat ki raushni kam hai

hamare haal-e-pareshan pe muskura dena

baDa latif ye andaz-e-pursish-e-gham hai

hayat-e-ishq umidon pe kaTne walo

KHabar bhi hai ki umidon ki zindagi kam hai

qafas mein the to chaman ke liye taDapte the

chaman mein aae to ahl-e-chaman ka matam hai

bashar ke dar pe jabin-e-bashar ka jhuk jaana

qasam KHuda ki ye tauhin-e-ibn-e-adam hai

wo dil chura ke nigahon se chhup gae 'shaarib'

nigah-o-dil se magar fasla bahut kam hai