KHush-fahmiyon ko dard ka rishta aziz tha

ḳhush-fahmiyoñ ko dard kā rishta aziiz thā

kāġhaz kī naav thī jise dariyā aziiz thā

ai tañgi-e-dayār-e-tamannā batā mujhe

vo paañv kyā hue jinheñ sahrā aziiz thā

pūchho na kuchh ki shahr meñ tum ho na.e na.e

ik din mujhe bhī sair o tamāshā aziiz thā

be-ās intizār o tavaqqo baġhair shak

ab tum se kyā kaheñ hameñ kyā kyā aziiz thā

vāda-ḳhilāfiyoñ pe thā shikvoñ kā inhisār

jhūTā sahī magar mujhe vaada aziiz thā

ik rasm-e-bevafā.ī thī vo bhī huī tamām

vo yār-e-bevafā mujhe kitnā aziiz thā

yādeñ mujhe na jurm-e-ta.alluq kī deñ sazā

merā koī na maiñ hī kisī kā aziiz thā

KHush-fahmiyon ko dard ka rishta aziz tha

kaghaz ki naw thi jise dariya aziz tha

ai tangi-e-dayar-e-tamanna bata mujhe

wo panw kya hue jinhen sahra aziz tha

puchho na kuchh ki shahr mein tum ho nae nae

ek din mujhe bhi sair o tamasha aziz tha

be-as intizar o tawaqqo baghair shak

ab tum se kya kahen hamein kya kya aziz tha

wada-KHilafiyon pe tha shikwon ka inhisar

jhuTa sahi magar mujhe wada aziz tha

ek rasm-e-bewafai thi wo bhi hui tamam

wo yar-e-bewafa mujhe kitna aziz tha

yaaden mujhe na jurm-e-talluq ki den saza

mera koi na main hi kisi ka aziz tha